Nga 36 raportime nga “Zyra e Ankesave”, Ministria e Mjedisit ka vepruar në 32 prej tyre

Nga 36 raportime për deponi ilegale të mbeturinave, që ka bërë “Zyra e Ankesave” në kuadër të fushatës “Ta pastrojmë Kosovën”, Ministria e Mjedisit dhe Planifikimit Hapësinor ka vepruar në 32 prej tyre.

Bazuar në këtë, në mesin e shumë zyrtarëve që i janë përgjigjur raportimeve të emisionit të mëngjesit në RTV Dukagjini, ministri Fatmir Matoshi, është përzgjedhur si më i përgjegjshmi karshi thirrjeve, dhe si veprues në zgjidhjen e problemeve të identifikuara.

Në një lidhje direkte në këtë emision, ministri Matoshi ka premtuar se do t’i përgjigjet secilit raportim të qytetarëve.

“Të gjithë qytetarët që kanë besuar tek Zyra e Ankesave, dhe kanë shpresuar se raportimet tek ky emision mund të rezultojnë me largim të deponive, raportimet e tyre janë pranuar nga ky emision dhe në shumicën e tyre janë ndërmarrë masa. Esenca e këtij angazhimi të tonë të përbashkët është që vendi ynë të jetë më i bukur dhe me kushte të favorshme dhe të shëndetshme”, ka thënë Matoshi.

Ministri Matoshi kampanjën tre mujorësh “Ta pastrojmë Kosovën”, e organizatës “Let’s Do it Kosova” e cilësoi si të suksesshme dhe premtoi në vazhdimin e përkrahjes  së projekteve të tilla.

Ai theksoi se këtë vit MMPH do të fokusohet në organizimin e fushatave vetëdijësuese për qytetarët dhe në zbatim të Udhëzimit Administrativ për ndëshkimet me gjoba për ata që hedhin mbeturina.