Në 21-vjetorin e vrasjes së Xhemajl Mustafës, Abdixhiku: Ishte një nga figurat kryesore të lëvizjes politike të viteve 90-ta

Në 21 vjetorin e vrasjes së atdhetarit e veprimtarit të Lidhjes Demokratike të Kosovës, Xhemail Mustafa, kryetari i LDK-së, Lumir Abdixhiku tha se Mustafa ishte një nga figurat kryesore të lëvizjes politike të viteve 90-ta.

Abdixhiku theksoi Xhemail Mustafa, ka lënë gjurmë të pashlyeshme në rrugën e shtet-ndërtimit të Kosovës.

“Xhemail Mustafa është një nga figurat kryesore të lëvizjes politike të viteve 90’,  personalitetet i afërt dhe mik i ngushtë me Presidentin Rugova, ai ishte prijatar i shumë proceseve në kohët më të vështira për Kosovën. Opusi i tij jetësor e krijues shtrihet në shumë dimensione.

Si shkrimtar, atdhetar e publicist, ai bashkë me intelektualët e kohës themeluan LDK-në, me të vetmin qëllim: lirinë dhe pavarësinë e Kosovës. Xhemail Mustafa, ka lënë gjurmë të pashlyeshme në rrugën e shtet-ndërtimit të Kosovës.

Ai për asnjë çast nuk e ndaloj aktivitetin e tij për të mirën e përbashkët, idealin dhe sakrificën sublime për vendin”, tha Abdixhiku.

Sipas kryetarit të LDK-së, në kohën kur ideali i lirisë ishte arritur, Xhemail Mustafës iu ndal rruga në gjysmë – në hyrje të banesës së tij, ai u vra gjakftohtësisht më 23 nëntor të vitit 2000.

“Vrasja e tij ishte një goditje e madhe jo vetëm për LDK-në por edhe për Kosovën.

Sot, edhe pas 21 vitesh, vrasja e tij mbetet e pazbuluar, për familjen, LDK-në dhe gjithë bashkëpunëtorët e tij, ndaj dhe dhimbja bëhet edhe më e madhe çdoherë.

Qoftë i përjetshëm kujtimi për jetën dhe veprën e Xhemail Mustafës!”, tha ai. /Telegrafi/