Rigjykimi për vrasjen e Donjeta Pajazitajt ka vazhduar me dëgjimin e dëshmisë së ish-policit hetues, Nestor Neziraj, mirëpo, me vendim të kryetarit të Trupit gjykues, Ibrahim Idrizi, është vendosur të ndalohet publikimi i dëshmisë së dëshmitarit.

Kjo është vendosur të enjten në Gjykatën Themelore në Ferizaj, ku ka vazhduar seanca e radhës e rigjykimit ndaj të akuzuarit Naser Pajazitaj, i cili ishte dënuar me burgim të përjetshëm për vrasjen e Donjeta Pajazitajt më 2015 në Deçan.

Andaj, gjykimi ka vazhduar me dëgjimin e dëshmitarit Neziraj i cili tha se është polic në Republikën e Kosovës, ndërsa në vitet 2013 deri 2015 kishte qenë në pozitën e hetuesit në Deçan.

Lidhur me deklaratën e dëshmitarit Neziraj, gjykatësi i çështjes tha që ndalohet publikimi i dëshmisë së dëshmitarit.

Tutje, gjykatësi Idrizi tha se pas propozimit në seancën e kaluar nga palët në procedurë, që deklaratat e të dëmtuarve dhe të dëshmitarëve të lexohen, trupi gjykues këtë propozim e ka aprovuar, andaj në këtë seancë u konsideruan të lexuara deklaratat e dëshmitarëve dhe të dëmtuarve.

Gjykimi ka vazhduar me administrimin e provave, pas administrimit të provave avokati mbrojtës Gëzim Kollçaku propozoi që të shikohet CD-ja, poashtu prokurorja Valbona Dishaj Haxhosaj propozoi të shikohen video incizimet nga kamerat e shtëpisë së Gzim Avdimetaj në kohën 13:44 deri 14:30. Këto propozime i aprovoi trupi gjykues.

Në këtë fazë të procedurës, Kryetari i Trupit Gjykues Ibrahim Idrizi tha se trupi gjykues ex-officio duke vlerësuar të nevojshme merr aktvendim që të bëhet shikimi në vendin e ngjarjes ku është gjetur trupi i tani të ndjerës Donjeta Pajazitaj.

Poashtu, për seancë të radhës gjykatësi Idrizi tha se do të ftohet eksperti i komunikacionit që pasi që t’i shikoj CD-të, të vlerësoj dhe të jepë konstatim se në këto dy video-incizime a bëhet fjalë për veturë të njejtë.

Seanca e radhës, ku do të shikohen video-incizimet u caktua më 24 maj 2022 ora 9:30, ndërsa më 25 maj 2022 do të bëhet rinkonstruimi në vendin e ngjarjes.

Fillimisht, Gjykata Themelore në Pejë, në mars të vitit 2018, të akuzuarin Naser Pajazitaj, në mungesë të provave e kishte liruar nga akuzat për vrasjen e Donjeta Pajazitaj, por pas ankesës së prokurorisë, Gjykata e Apelit e kishte kthyer këtë lëndë në rigjykim.

Pas kthimit në rigjykim, Gjykata Themelore në Pejë, në mars të vitit 2019, e kishte shpallur fajtor të akuzuarin dhe e kishte dënuar me burgim të përjetshëm. Ky dënim ishte vërtetuar pastaj edhe nga Gjykata e Apelit në korrik të vitit 2019.

Por, në nëntor të vitit 2019, Gjykata Supreme i kishte prishur të dy aktgjykimet e Gjykatës Themelore në Pejë dhe të Gjykatës së Apelit dhe lëndën e kishte kthyer në rigjykim.

Pas kthimit të rastit në rigjykim, Gjykata Themelore në Pejë ishte përjashtuar nga ky rast dhe lënda ishte deleguar në Gjykatën Themelore në Ferizaj, me arsyetimin për të mënjanuar dyshimet ndaj sistemit të drejtësisë.

Vendimi për delegimin e lëndës në Ferizaj ishte marrë nga Gjykata e Apelit.

Gjykata Themelore në Ferizaj, më 27 maj 2021, e kishte dënuar Pajazitajn me burgim të përjetshëm për vrasje të rëndë.

Më pas, Gjykata e Apelit e ka kthyer çështjen në rigjykim.

Sipas aktakuzës së ngritur më 8 qershor 2017 nga prokurorja Valbona Disha Haxhosaj, Naser Pajazitaj po akuzohet se më 9 nëntor 2015, në bjeshkët e Strellcit, Komuna Deçan e pikërisht në vendin e quajtur te “Kroni i Lajthisë“, i pandehuri edhe pse më parë ka qenë i dënuar për vrasje, me dashje dhe me armë dhe atë revole të tipit të panjohur në mënyrë mizore e ka privuar nga jeta viktimën Donjeta Pajazitaj nga po i njëjti fshat.

Një gjë të tillë, sipas aktakuzës, Pajazitaj e ka bërë në atë mënyrë që derisa viktima ditën kritike ka qenë duke shkuar në punë në këmbë së bashku me axhën e saj dhe kur kanë arritur tek bunari i fshatit janë ndarë, ashtu që viktima ka vazhduar rrugën në drejtim të Strellcit të Epërm dhe kur afrohet përafërsisht 150 metra afër shtëpisë së Nedi Jusaj, aty pari kalon i pandehuri Naser Pajazitaj me veturën e tij të tipit xhip sheroke me ngjyrë të kaltër i cili ndalet e merr viktimën me veturë, e më pas vazhdon në drejtim të bjeshkëve të Strellcit dhe kur arrin tek “Kroni i Lajthisë” fillimisht e privon me armë duke shtënë dy herë në kokë, e më pas për të humbur gjurmë të njëjtën e mbulon me disa drunjë dhe largohet nga vendi i ngjarjes, kurse viktima më 27 dhjetor 2015 është gjetur pa shenja jete në vendin e ngjarjes nga disa kalimtarë të rastit.

Sipas aktakuzës, Pajazitaj akuzohet se më parë e gjerë më 9 nëntor 2015, në fshatin Strellc Komuna e Deçanit, pa autorizim ka poseduar armën dhe atë një revole të tipit të panjohur dhe një pushkë gjuetie me numër serik 0193117 si dhe 12 fishekë të kësaj pushke , në atë mënyrë që më revole ditën kritike ka kryer veprën penale të cekur si më lartë.

Gjithashtu, sipas aktakuzës më parë dhe gjerë më 23.05.2017, në fshatin Strellc i Ulët Komuna e Deçanit, i akuzuari pa autorizim ka poseduar armën dhe atë një armë AK-47 me numër serik 120331141 dhe 2 karikator të zbrazet, ashtu që policia gjatë bastisjes dhe kontrollit në shtëpinë e të pandehurit në dhomën e fjetjes ka gjetur dhe sekuestruar armën e cekur si më lartë.

Me këto veprime, prokuroria e ngarkon të akuzuarin se ka kryer veprën penale të “Vrasjes së rëndë” nga neni 179 i KPRK–së dhe për veprën penale “Mbajtja në pronësi, kontroll ose posedim të paautorizuar të armëve” nga neni 374 i KPRK–së, njofton betimiperdrejtesi.