Musliu: Përmes librave serbët tregojnë si e ëndërrojnë okupimin e kampit “Bondsteel”

Drejtori i Institutit Octopus, Agim Musliu ka komentuar librin propagandistik “Brenda vitit në Prizren”, i cili është shtypur dhe i shitur në Serbi e që iu dedikohet fëmijëve. 

Musliu përmes një statusi në rrjetin social në Facebook ka shkruar se disa nga ilustrimet e këtij libri tregojnë se si e ëndërrojnë serbët që të okupojnë edhe kampin amerikan Bondsteel.

“Shteti që udhëhiqet nga gebelsi ballkanik, Vuçiqi, ish-ministri i propagandës së kriminelit të luftës Millosheviq, ka botuar edhe një libër me vizatime për fëmijë, me titull shovenist ‘Brenda vitit në Prizren’. Disa nga ilustrimet e këtij libri tregojnë se si e ëndërrojnë serbët edhe Kampin amerikan Bondsteel – të okupuar nga ushtria e çetnikët serbe; forcat serbe në oborrin e manastireve ortodokse në Kosovë etj”, shkruan Musliu në rrjete sociale.

Musliu thekson se nuk është libri i vetëm që tregon ambiciet okupuese të Serbisë ndaj Kosovës, pasi ka edhe të tjerë.

“Ky libër me vizatime nuk është i pari që shpërfaq ambiciet okupuese ushtarake serbe ndaj Kosovës. Libra të tjerë të ngjashëm janë botuar atje, e të cilët hapur flasin për orientimin serb anti-NATO-s dhe tejet për Rusinë”, vijoi Musliu.

Ndryshe, libri “Brenda vitit në Prizren” ndjek personazhe dhe ngjarje që nxisin nacionalizëm, dhunë dhe bëjnë thirrje për trazira, duke përdorur narrativën nacionaliste si një mjet me ndikim. /Telegrafi/