Munishi largohet nga Vëllaznimi, tregon arsyen e largimit

Trajneri karizmaik kosovar, Ismet Munishi, ka vendosur që të largohet sot nga skuadra e Vëllaznimit.

Munishi ka rrëfyer arsyet e largimit duke thënë se nuk po largohet për shkak të krizës financiare.

Vëllaznimi në këtë edicion është përballur me krizë të madhe financiare derisa futbollistët nuk kanë marrë paga tash e dy muaj.

“Nuk po largohem për shkak të krizës financiare, por për shkak të pasojave që ka lënë kriza financiare. Më vjen shumë keq dhe jam i zhgënjyer që nuk kam arritur tua përmirësoje karakterin disa futbollistëve që deri pardje kanë qenë korrekt”.

“Nuk i pranojë vendimet e lojtarëve edhe nëse kanë të drejt. Çfarë gabimi kanë bërë ata sot, do ta shohim në vazhdim. Më erdhi shumë keq që lojtarët fantastik po bien në ndikimin e lojtarëve që kontributin e tyre sivjet, e kishin shumë të vogël. Më vjen keq  të them, por jam i zhgënjyer me disa lojtarë”, ka thënë Ismet Munishi për GazetaOlle.com.

Tutje, trajneri i suksesshëm kosovar tha se disa lojtarë vetëm sa e kanë shfrytëzuar Vëllaznimin.

“Kam menduar që Vëllaznimin e duan më tepër, por jo. Vëllaznimin e kanë shfrytëzuar maksimalisht për fushata politike. Shumë gjenerata të lojtarëve kanë vuajtur pa kushte për vite më radhë në Gjakovë. Vëllaznimin nuk e solla unë, ai është i juaji. Hapni sytë mirë sepse prapë mund të bjerë nga liga”, përfundoi Ismet Munishi.

Trajneri i mirënjohur e mori Vëllaznimin në fillim të këtij edicioni duke e bërë një skuadër shumë kompakte me futbollistë jo shumë të njohur.

Vëllaznimi kur kanë kaluar 14-të xhiro në Vala Superligë ndodhet e teta me 21 pikë të grumbulluara, pesë më pak se lideri Llapi.