Muja: Çdo kokërr grurë e blerë me para publike duhet të jetë këtu, Mushkolaj: Kush është Ridvan Muharremi që negocion në emër të Kosovës?

Deputeti nga radhët e Lëvizjes Vetëvendosje, Armend Muja, ka deklaruar se 0.5 për qind e grurit është sasia e cila mungon në rezervat shtetërore, duke iu referuar dosje së Prokurorisë Speciale të Republikës së Kosovës. Ndërsa analisti Imer Mushkolaj pyeti se kush është Ridvan Muharremi, që u zgjodh nga ministrja Hajdari të negociojë blerjen e mallrave për rezervat shtetërore.

Muja ka deklaruar se i tërë gruri duhet të jetë prezent nëse blihet me para publike.

“Çdo kokërr grurë e blerë me paratë publike duhet të jetë këtu, ky është qëndrimi im. Sulmet që bëhet me pretendime të paqena, të paverifikuara thuhet gjysma mungon dhe pastaj del një dosje e prokurorisë, ku thotë se 52.5 tonë mungojnë. 0.5 për qind, as një përqind. Çdo cent e parave publike, çdo kokërr gruri duhet të jetë këtu. 05. përqind gjatë gjithë javës së kaluar ka thënë se do arrestohet ministra, një çështje që nuk është në dorën e saj.”, ka deklaruar Muja, në “Debat Plus” të RTV Dukagjini.

Muja tha nëse do duhej të ndodhte arrestimi i ministres Hajdari për më pak se një përqind të mungesës së grurit, çfarë do ndodhte me kontratat që marrin vite kohë realizimi?

“Çka shteti din është se ministrja ka nënshkruar një kontratë për dhjetë mijë ton. Dhe nëse është nënshkruar, dhjetë mijë ton duhet të jenë në Kosovë. Ka pretendime se pse po mungojnë, por mendoj se është një çështje civile, kontestimore e cila duhet të rregullohet nga ai që e ka për obligim. Nëse për 0.5 për qind të grurit duhet të arrestohet një ministër apo zyrtar, imagjinoje për 80 për qind të kontratave që vonohen me vite’, ka deklaruar Muja.

“Aferën e grurit dhe vajit’, Muja e ka vlerësuar si një përpjekje për të goditur Qeverinë Kurti.