Miralem Pjanic është i vendosur të largohet nga Barcelona pasi një lëvizje shokuese në Sharjah FC të Ligës Pro të Emirateve të Bashkuara Arabe është më afër.
32-vjeçari iu bashkua gjigantëve katalanas nga Juventusi në vitin 2020, pasi periudha e tij me klubin ka qenë kryesisht një zhgënjim.
Sipas specialistit të transferimeve Fabrizio Romano, trajneri i Barcelonës - Xavi ka konfirmuar largimin e Pjanic dhe më pas e ka lënë atë jashtë skuadrës së klubit.
“Pjanic ka vendosur të largohet për më shumë mundësi – ai ka qenë një profesionist i madh, kështu që unë mendoj se ai kishte shanse këtu, por secili zgjedh rrugën e vet”, ka deklaruar trajneri i klubit katalunas.
Nëse Pjanic do të nënshkruajë një lëvizje në Sharjah FC, ai do të ribashkohet me ish-shokun e skuadrës së Barcelonës, Paco Alcacer, i cili iu bashkua më herët gjatë verës.
Para largimit të tij të afërt, Pjanic u emërua në stol për çdo ndeshje të Barcelonës deri më tani këtë sezon, megjithatë, ai nuk ka arritur të luajë asnjë minutë të vetme.
Sezonin e kaluar, ai nuk arriti të vendoset në skuadrën e Barcelonës dhe u huazua te skuadra turke, Besiktas, me të cilën bëri 26 paraqitje.
Me lojtarë si Sergio Busquets, Frenkie de Jong, Pablo Gavi dhe Pedri përpara tij në renditjen e mesfushës, Pjanic nuk mbeti pa zgjidhje tjetër veçse të kërkonte një largim nga Camp Nou. /Telegrafi/
