Mosekzekutimi i pagave, minatorët e Trepçës të enjten protestojnë para Qeverisë

Minatorët e Trepçës do të protestojnë ditën e enjte para Qeverisë së Kosovës.

Sindikata e Pavarur e Minatorëve të Trepçës thotë se protesta do të jetë paqësore.

“Minatorët e Trepçës së Kosovës kanë marrë vendim për të organizuar proteste paqësore për shprehjen e pakënaqësive, per padrejtësitë e vazhdueshme që tashme janë bërë të ditura, pra mosrealizimi i pagave per minatorët e Trepçës për më shumë se dy muaj. Protesta do të mbahet në Prishtinë pranë Qeverisë së Republikës së Kosovës, ditën e enjte, me date 15.08.2024 nga ora 12:00”, thuhet në njoftim.

Tutje, bëhet e ditur se marshimi do të fillojë nga sheshi Zahir Pajaziti-Prishtine, deri pranë objektit të Qeverise së Republikës së Kosovës.

Kjo protestë reflekton kërkesën e vetme të minatorëve, e që është pagat e papaguara për gati tre muaj.

“Ta dini që situata e minatorëve është rënduar tej mase, mosekzekutimi i pagave i ka dërguar minatorët në një situatë krize për ekzistence, andaj si mjet për të kërkuar bukën e gojës për vete dhe familjen e tyre ka mbetur të protestuarit si mjet ligjor dhe demokratik”, thuhet në njoftim./Telegrafi/