Mendoi se kishte revole në dorë, polici amerikan qëllon për vdekje të riun – doli se kishte pasur cigare elektrike

Policia në Columbus të Ohios, ka publikuar mbrëmë (e martë) pamjet nga kamerat e vendosura në uniformat e zyrtarëve policorë, pasi që një polic vrau një afro-amerikan 20-vjeç, vetëm një sekondë pasi që e kishte vërejtur se gjendej brenda dhomës.

Në videon e publikuar gjatë një konference për media, mund të shihet se si polici shtie mbi Donovan Lewis pasi e lokalizon brenda apartamentit të tij. Para se të qëllohej, Lewis po qëndronte i shtrirë në shtrat dhe kur i pa, ngriti duart lart, transmeton Telegrafi.

Zëdhënësja e policisë, Elaine Bryant, ka thënë në konferencën për media se polici Ricky Anderson ka shtënë me revole, pasi i është dukur që Lewis mbante në dorën e ngritur revole.

Ajo shtoi se më vonë në shtratin e tij është gjetur një pajisje që e ka përshkruar si cigare elektrike, dhe pranë trupit të pajetë nuk ka pasur kurrfarë armë zjarri.

E derisa të përfundojnë hetimet, polici 30-vjeç është suspenduar.

“Donovan Lewis ka humbur jetën. Si prind, bashkëndjejë me nënën e tij. Bashkëndjejë si pjesëtare e komunitetit”, shtoi zëdhënësja e policisë. /Telegrafi/