Memedi: Më larguan nga Teatri i Tetovës dhe punësuan maqedonas (Foto)

Teatrit të Tetovës i del edhe një problem që tani bëhet publik nëpërmjet rrjeteve sociale nga aktori Florim Memedi, transmeton Telegrafi Maqedoni.

Ai në Facebook shkruan ”Udhëheqësia e teatrit të Tetovës me drejtor shqiptar pasi e fitova të drejtën e punës me vendim si aktor i diplomuar, pak më herët më larguan nga puna me një telefonatë nga shtëpia e zullumeve në fshatin Reçicë e Vogël. Betohem që dy javë pas nënshkrimit të vendimit personalisht më ësht thënë: e kemi patjetër të largojmë 2 shqiptarë të sjellim 2 maqedonas se na bëjnë presion nga OBRM-PDUKM(VMRO-DPMNE) pasi kështu ka qenë marrëveshja me ministreshën Elizabeta Kançevska-Milevska, me qëllim për me fut ca lek më shumë në xhep.” shkruan mes tjerash Memedi.

Memedi gjithashtu për Telegrafi Maqedoni ka informuar se ai e ka hedhur në gjyq Teatrin e Tetovës dhe tani pret vendimin që do ta sjell Gjykata e Apelit në Gostivar.

Përndryshe, probleme tjera të Teatrit të Tetovës mund të numërohen si mungesa e nxemjes gjatë stinës së dimrit, shkurtimi i 1 milion eurove nga Ministria e Kulturës për ndërtimin e objektit të ri, dhe problem tjetër mbetet ndarja e fondeve për realizimin e shfaqjeve gjatë vitit./Telegrafi/