Malinovskyi i Atalantas: Ronaldo nuk është lojtari më i mirë në Serie A

Mesfushori i Atalantas, Ruslan Malinovskyi, beson se Cristiano Ronaldo nuk është lojtari më i mirë në Serie A, ndërsa shton se Luis Muriel ka mundur të luajë për Barcelonën.

28-vjeçari arriti shifra të dyfishta me gola dhe asistime për Atalantan në sezonin 2020-21, duke e ndihmuar skuadrën të kap sërish një vend në Ligën e Kampionëve për sezonin e tretë radhazi.

Kur u pyet se kush është lojtari më i mirë i Serie A, Malinovskyi nuk e zgjodhi Ronaldon.

“Unë nuk do të them se ai është lojtari më i mirë në Itali, besoj se ka lojtarë më të mirë se ai”.

“Mund të them se lojtari më i mirë me të cilin kam luajtur është [Luis] Muriel. Ai është një futbollist i jashtëzakonshëm”.

“Nëse gjërat do të kishin shkuar ndryshe, ai mund të kishte luajtur për Barcelonën, është e vështirë të besosh pse nuk ka ndodhur”.

“Ndoshta kjo varet nga karakteri i tij, por Muriel është shpirti i dhomës tonë të zhveshjes, ai është gjithmonë i buzëqeshur”, ka thënë ukrainasi.

Malinovskyi zbuloi se ai mund të ishte bashkuar me Sampdorian në vend të Atalantas, por këta të fundit ishin më të interesuar. /Telegrafi/