LVV nis festën në Prishtinë, pasi Kurti shpalli fitoren në zgjedhje

Lëvizja Vetëvendosje (LVV) ka nisur festën në kryeqytet, pasi rezultatet preliminare e vendosin atë si forcën e parë politike në vend.

Kandidati për kryeministër nga Lëvizja Vetëvendosje, Albin Kurti, ka deklaruar se partia e tij, së bashku me koalicionin “Guxo” dhe “Alternativa”, janë fituesit e zgjedhjeve të fundit.

Në një tubim me simpatizantët në sheshin “Skënderbeu” në Prishtinë, Kurti vlerësoi procesin zgjedhor si demokratik dhe të qetë, duke falënderuar autoritetet për organizimin.

“Procesi zgjedhor ka qenë demokratik, pa incidente. E falënderoj policinë dhe institucionet përgjegjëse për angazhimin e tyre. Kështu ndodh kur qeveria jemi ne, zgjedhjet zhvillohen lirshëm dhe në mënyrë të ndershme”, theksoi ai.

Kurti po ashtu kritikoi ashpër opozitën, duke e akuzuar për bashkëpunim me oligarkët dhe përpjekje për të penguar qeverinë.

Ai deklaroi se pavarësisht këtyre përpjekjeve, opozita ka dështuar të fitojë besimin e qytetarëve.

“Kurrë nuk është bërë më tepër luftë ndaj një qeverie sesa ndaj kësaj tonës. Me oligarkë që japin para pa hesap dhe me opozitë që bën marrëveshje edhe me dreqin kundër nesh. Por sërish kanë humbur dhe do të mbeten opozitë, sepse nuk ia duan të mirën as shtetit dhe as popullit”, deklaroi Kurti.

Rezultatet zyrtare të zgjedhjeve pritet të konfirmohen nga KQZ në ditët në vijim.

Ndërkohë, procesi i numërimit të votave po vazhdon, ndërsa Komisioni Qendror i Zgjedhjeve ka konfirmuar se për shkak të një problemi teknik me platformën elektronike, rezultatet po mblidhen manualisht nga vendvotimet.