Lëndimi i Icardit nuk është serioz, i gatshëm për Atalantan

Luciano Spalletti mund të qëndrojë i qetë, lëndimi i Mauro Icardit nuk është serioz.

Kapiteni i zikaltërve nuk ka pësuar asnjë dëmtim të rëndë, e për të bëhet fjalë vetëm për një ndalesë disaditore, gjatë të cilave duhet t’i nënshtrohet fizioterapisë dhe një programi stërvitor të diferencuar.

Pas ndeshjes së Torinos, në shtëpinë e Interit u shqetësuan dhe iu frikësuan një dëmtimi të rëndë të Icardit, por testet mjekësore treguan se një pistë e tillë përjashtohet totalisht.

Argjentiasi pësoi vetëm një goditje, e për pasojë duhet të punojë i diferencuar.

Një gjë e tillë bën që Spalletti “të flejë i qetë”, duke pasur parasysh se kampionatet janë ndalur për një javë, për shkak të impenjimeve të ekipeve kombëtare, disa në “play off”-e e disa të tjera në takime miqësore.

Lajmi konfirmohet edhe nga komunikata zyrtare e klubit të Interit, ku thuhet ndër të tjera se lojtari ka pësuar vetëm një goditje dhe inflamacion në pjesën e brendshme të gjurit të djathtë, gjatë takimit të së dielës kundër Torinos në San Siro.

Për të parashikohen katër apo pesë ditë rikuperimi, përmes programit të diferencuar dhe do të jetë sërish në dispozicion të urdhrave të trajnerit Spalletti.

Deri më tani në këtë sezon 24-vjeçari ka shënuar 11 gola. Ndeshja e ardhshme e Interit është ndaj Atalantas. /TCh/