Zyrtarë të Lidhjes Demokratike të Kosovës kritikuan sot Qeverinë Kurti për menaxhimin me pandeminë, duke thënë se Kosova është vendi me përqindjen më të ultë të vaksinimit në rajon e Evropë.

Shqipe Mjekiqi, nënkryetare e LDK-së, tha sot në një konferencë për media se Qeveria Kurti po keqmenaxhon situatën me pandeminë.

Ajo tha se pavarësisht situatës dhe rritjes së rasteve me coronavirus deri tani janë vaksinuar vetëm 10 për qind e popullatës.

“Të dhënat janë tejet të ulëta në vaksinim në krahasim vendet e rajonit”, tha ajo.

Sipas saj, tashmë edhe masat e ndërmarra antiCOVID janë të vonuara dhe shprehu habinë se si mund të ketë kufizime për të mosvaksinuarit kur nuk ka terminë për vaksinim.

Ajo kritikoi edhe ministrin e Shëndetësisë, Arben Vitia për kandidimin për kryetar të Prishtinës në këtë kohë kur situata me pandeminë është përkeqësuar.

“…Pritjet më të mëdha në këtë kohë të pandemisë janë pikërisht nga ministri i Shëndetësisë, i cili sipas informatave edhe zyrtarisht do jetë kandidat për Komunën e Prishtinës. Në një moment të tillë personi kyç në këtë ministri do të jetë pjesë e fushatës dhe do përkushtohet edhe pozicionit të ri nëse zgjidhet. E shohim tejet shqetësues këtë…”, tha Mjekiqi.

Ndërkaq, infektologu Izet Sadiku nga LDK tha se situata epidemiologjike është përkeqësuar dhe kjo tregon se menaxhimi i pandemisë ka dështuar.

Ai tha po ashtu se Kosova është në grupin e shteteve me përqindjen më të ultë të të vaksinuarve në Evropë.

Sipas tij, nëse vazhdohet me këtë trend gjasat janë që deri në fund të vitit të vaksinohen deri në 30 për qind të popullatës, e 60 për qind siç ka thënë Qeveria.

Ai tha se varianti Delta përhapet me shpejtësi të madhe dhe sipas tij, gabimi i Qeverisë ka qenë se që disa vendi ka funksionuar sikur të mos kishte pandemi.

“Nuk është zgjidhje vetëm sigurimi i vaksinave… ky është njëra prej gabimeve që ka bërë Qeveria Kurti se i ka bind qytetarët se u kry pandemia… kemi siguru vaksina boll, s’ka raste më, shkoni në dasma, në lokale. Tash është vështirë që një popullatë që dy muaj është sjell krejt e lirë përnjëherë me mbajt maskën, distancën, prandaj këtu duhet përkushtim shumë më i madh se sigurimi i vaksinave.

Sigurimi i vaksinave sot në treg nuk është shumë i vështirë, vetëm a i ke mjetet dhe i blen…. por problemi është menaxhimi i tyre dhe bindja e qytetarëve për t’i vaksinuar…”, tha Sadiku.

Sipas tij, me shifrat e fundit të të infektuarve me coronavirus situata po del jashtë kontrollit. /Telegrafi/