Kurti: Në periudhën e vet-izolimit është rritur dhuna në familje, kjo është e papranueshme

Kryeministri në detyrë i Kosovës, Albin Kurti, përmes një video-mesazhi drejtuar qytetarëve ka thënë se është i shqetësuar se në kohën e pandemisë së coronavirusit është rritur edhe dhuna në familje.

Kurti ka thënë se dhuna është e papranueshme dhe e dënueshme, transmeton Telegrafi.

“Si drejtues të institucioneve jemi të shqetësuar se me situatën e vetizolimit për shkak të pandemisë së coronavirusit është rritur edhe dhuna në familje. Dhuna asnjëherë nuk ka arsyetim. Për ne është e papranueshme dhe e dënueshme. Qeveria jonë e ka rritur buxhetin e strehimoreve për të mbijetuarat e dhunës në vlerën prej 900 mijë euro. Jemi duke parë format për shtimin e fondeve të programeve kundër dhunës në familje, çfarëdo forme që merr ajo: fizike, psikike apo seksuale”, ka thënë Kurti në video-mesazhin drejtuar qytetarëve, përcjell Telegrafi.

Më tej, Kurti ka pohuar se çdo rast i dhunës duhet të raportohet dhe institucionet përgjegjëse duhet të rrisin reagimin në trajtimin e rasteve.

“S’është kollaj kur të jetosh do të thotë veçse të banosh i mbyllur, në hapësirë të kufizuar në stinën e bukur të pranverës.  Në këtë kohë qëndrimi në shtëpi na shpëton nga virusi, por dhuna nuk guxon të izolohet si çështje private brenda shtëpive. Ajo duhet të raportohet e institucionet përgjegjëse të rrisin reagimin në trajtimin e rasteve. Çdo rast i dhunës është rast urgjent. Virusi nuk mund ta shtyjë për më vonë ndalimin dhe dënimin e dhunës. Prandaj, rrini në shtëpi, rrini të pastër, rrini në distancë, mbështetni njëri-tjetrin dhe ndani punët bashkë”, thotë Kurti.

Ndryshe dje Policia e Kosovës ka njoftuar se vetëm në tre mujorin e parë të vitit 2020 janë raportuar 481 raste të dhunës në familje./Telegrafi/