LDK miratoi strukturën e re organizative, nis reformat në degë dhe themelon shkollën politike

Kryesia e Lidhjes Demokratike të Kosovës në mbledhjen e sotme ka marrë disa vendime, në lidhje me organizimin e brendshëm, të propozuar nga kryetari Lumir Abdixhiku.

Në përputhje me Platformën për reforma dhe riorganizim, të paraqitur nga kryetari dhe të miratuar nga Këshilli i Përgjithshëm i LDK-së, Kryesia mori vendim që të krijojë ekipet të cilat do ta bëjnë vlerësimin e gjendjes aktuale në Degët e LDK-së.

Në komunikatën e LDK-së thuhet se këto ekipe do të propozojnë mënyrat që do të ndiqen në procesin e reformimit të thellë të degëve.

“Procesi i reformimit synon të riorganizojë degët dhe t’i hapë ato ndaj individëve me kredibilitet dhe të rinjve që besojnë në vlerat tona të përbashkëta. Po ashtu, ekipet e Kryesisë do të ndihmojnë Degët në përgatitjet për zgjedhjet lokale”, thuhet në komunikatë.

Në mbledhjen e sotme u aprovua propozimi i kryetarit Abdixhiku për strukturën e re organizative, sipas të cilës riorganizohet Zyra për medie dhe Qendra për Informim e Kosovës – QIK.

Gjithashtu në kuadër të Fondacionit “Ibrahim Rugova” themelohet Shkolla Politike.

Kryesia e Lidhjes Demokratike, aprovoi formimin e gjashtë departamenteve:

Departamenti i Politikës së Jashtme;
Departamenti i Rendit, Ligjit dhe Sigurisë;
Departamenti i Ekonomisë dhe Biznesit;
Departamenti i Arsimit, Kulturës dhe Sportit;
Departamenti i Shëndetësisë;
Departamenti i Rinisë;
Departamenti i Avancimit Shoqëror.

Këto departamente do të përgatisin dhe hartojnë qëndrimin e Lidhjes Demokratike të Kosovës, si dhe alternativën opozitare ndaj pushtetit. /Telegrafi/