Krerët e Kosovës, të tronditur nga sulmet në Ankara

Presidentja e Kosovës, Atifete Jahjaga, ka reaguar ndaj sulmit të sotëm në Ankara të Turqisë.

“E tronditur nga sulmi terrorist në Ankara. Ngushëllime familjeve te viktimave dhe qytetarëve të Turqisë”, ka shkruar Jahjaga.

I tronditur nga sulmi i sotëm terrorist në Ankara të Turqisë, është shprehur edhe kreu i Kuvendit të Kosovës, Kadri Veseli.

“Jam i tronditur nga sulmi i sotëm terrorist në Ankara të Turqisë, një vendi mik dhe përkrahës i madh i shtetit tonë”, ka thënë Veseli. “I shpreh ngushëllime popullit dhe Republikës së Turqisë. Ne bashkëndjejmë me dhimbjen e tyre në këto momente të rënda dhe do të jemi përkrah tyre në luftën kundër terrorizmit, kësaj të keqeje universale”.

Kryeministri i Kosovës, Isa Mustafa, i ka dërguar një telegram kryeministrit të Turqisë, Ahmet Davutoglu, duke i shprehur ngushëllime pas sulmit terrorist në Ankara, i cili la të vdekur dhjetëra njerëz të pafajshëm dhe dhjetëra të tjerë u plagosën.

Sipas njoftimit të Kryeministrisë, Mustafa shprehu pikëllimin e thellë dhe solidaritetin e qytetarëve e të Qeverisë së Kosovës me popullin turk dhe me familjarët e viktimave e të plagosurve, në këtë akt të rëndë terrorist.

Në telegram, Mustafa thekson se terrorizmi tashmë është kërcënim serioz për të gjitha vendet, duke shprehur përkushtimin e plotë të Republikës së Kosovës në luftën e përbashkët globale të botës demokratike, të udhëhequra nga SHBA-të, kundër të gjitha formave të radikalizmit të dhunshëm dhe terrorizimit.

Edhe presidenti në ardhje, Hashim Thaçi, ka shprehur ngushëllime për Turqinë dhe Bregun e Fildishtë.

“Edhe një sulm me bombë në Ankara, duke goditur popullin dhe shtetin mik turk. Ngushëllimet e sinqerta për familjarët e viktimave. Sulmet e kësaj mbrëmje në Turqi, por edhe në Bregun e Fildishtë, tregojnë se rreziku i terrorizmit është global dhe në këtë betejë edhe Kosova është pranë aleatëve tonë”, shkruan Thaçi.