Kovac i del në mbrojtje Perisicit: Mos u merrni me moshën e lojtarit, por shikojani karrierën

Bayern Munich ka triumfuar 3-1 kundër Energie Cottbus në kuadër të Kupës së Gjermanisë dhe kjo ishte një mundësi që reporterët të pyesin trajnerin, Niko Kovac rreth përforcimeve të mundshme.

Sigurisht, një nga temat kryesore në këtë drejtim në Bavari është Ivan Perisic, të cilin kroati dëshiron ta sjellë te bavarezët dhe mediat thonë se transferimi është çështje orësh.

“Futbollisti meriton respekt. Ne nuk duhet të shikojmë se sa i moshuar është një lojtar, ne duhet të shikojmë se çfarë ka arritur në karrierë dhe si mund të na ndihmojë”, tha Kovac kur u pyet për sulmuesin anësor.

Perisic është parë gjatë mëngjesit së ditës së djeshme në Munich, ku iu nënshtrua një kontrolli mjekësor përpara se të nënshkruan një kontratë me Bayernin. Ai është fotografuar nga reporterët e Bildit, të cilëve u konfirmoi lajmin.

“Po, unë isha nën ekzaminim mjekësor. Do të bëj çmos”, tha lojtari shkurtimisht gazetarëve gjermanë.

Lexo po ashtu Perisic i kalon testet mjekësore: Do të jap më të mirën te Bayerni

Ndryshe, Bayerni do të paguajë Interin pesë milionë euro për huazimin njëvjeçar dhe do ta ketë mundësinë që të blejë kontratën e lojtarit në fund të sezonit me një kosto prej 20 milionë eurosh. /Telegrafi/