LAJMI I FUNDIT:

“Konsumatori” thotë se taksa ngriti çmimet, qytetarët “betohen” për të mos blerë produkte serbe (Video)

“Konsumatori” thotë se taksa ngriti çmimet, qytetarët “betohen” për të mos blerë produkte serbe (Video)

Kohët e fundit kishte ankesa se janë rritur çmimet e produkteve në vend. Nga organizata “Konsumatori” thuhet se kjo është pasojë e taksës, ndërkaq kishte qytetarë që thonin se edhe nëse trefishohet çmimi i produkteve vendore, mjafton të mos ketë produkte serbe.

Shporta e qytetarit po kushton më shtrenjtë. Selatin Kaçanaiku nga organizata “Konsumatori”, thotë se në këtë pikë ka pasur ndikim taksa ndaj prodhimeve serbe, ndërkaq kjo ndikon drejtpërdrejtë në mirëqenien e qytetarëve.

“Çmimet te ne ndikojnë në uljen e standardit-mirëqenien sociale, uljen e ekonomisë, ndikon në uljen e vendeve të punës etj. Pra, ngritja e çmimeve nuk është një gjë e thjeshtë, është një konglomerat që shfaq shumë probleme me të cilat duhet të merret Qeveria. Qeveria dhe të gjitha ministritë duhet ta monitorojnë tregun, dhe nivelin e kënaqshmërisë sonë si taksapagues”, deklaroi Selatin Kaçaniku për RTV Dukagjinin.

Ekonomisti Mustafë Kadriaj, akuzon qeverinë se nuk ka reaguar si duhet, pas vendosjes së taksës.

“Qytetarët kanë drejtë të ankohen. Po ashtu edhe bizneset kanë të drejtë t’i arrijnë qëllimet e veta ekonomike përfituese, por faji mbetet te Qeveria. Ajo pavarësisht se ka marrë masa ndaj shtetit fqinj, mendoj që është dashur t’i merr masat që ti mbulojë mungesat me importe nga shtetet tjera fqinje”, deklaroi Mustafë Kadriaj.

Përkundër kësaj, pati qytetar që thanë se edhe nëse trefishohen çmimet e prodhimeve vendore, mjafton të mos ketë produkte serbe.

“Unë konsumoj prodhimet vendore. Unë për “shpirt timin”, nuk do të lë kurrë prodhim të Serbisë të hyjë brenda”, tha Ali Mushkolaj.

Përkundër presioneve ndërkombëtare, Qeveria e Kosovës insiston se taksa nuk hiqet. /RTV Dukagjini/ Telegrafi/