Rreth betejës për drejtësi, në çështjen e besimit të pafajësisë së ish-krerëve të UÇK-së të akuzuar nga Gjykata Speciale, në emisionin ”Debat Plus” me Ermal Pandurin në RTV Dukagjini, ka qenë i ftuar Safet Syla, ish-kolonel i Ushtrisë Çlirimtare të Kosovës(UÇK).

Ai është pyetur rreth çështjes së ekzistimit të arkivit të UÇK-së, ku këtë gjë e ka mohuar duke thënë se UÇK-ja nuk ka pasur kurrë arkiv.

”Ne nuk kemi pasur asnjëherë arkiv të UÇK-së, nuk e di se cilat arkiva do t’i hapë kryeministri Kurti”, ka thënë Syla.

Ai shton se duke qenë drejtor i përgjithshëm i Zyrës për Çështje të trashëgimisë së Trupave Mbrojtëse të Kosovës (TMK) nuk ka pasur asnjë dokumentacion lidhur me UÇK-në, por vetëm material elektronik, apo si të thuhet databazat elektronike, me të cilat pajisen pjesëtarët e TMK-së, për kohën e shërbimit, detyrën dhe pensionimit të tyre.

Ndër të tjerash, Syla thotë se në këto materiale nuk ka asnjë komunikatë të UÇK-së, por ka dokumentacione të aktivitetit 10 vjeçar të TMK-së.

Qeriqi: Asnjëherë nuk i kemi parë krerët e UÇK-së në zonat për të cilat Gjykata Speciale ka pretendime Qeriqi: Asnjëherë nuk i kemi parë krerët e UÇK-së në zonat për të cilat Gjykata Speciale ka pretendime

”Nga 20 shtatori i vitit 1999 deri më 21 janar të vitit 2009 jemi përgjegjës të databazave elektronike nga transformimi i UÇK-së në trupa mbrojtëse të Kosovës deri në shpërbërjen e TMK-së dhe formimin e FSK-së”, tha ish koloneli, transmeton PortaliD.

Ai përfundon duke thënë se një pjesë e dokumentacionit të TMK-së janë arkivuar në arkivin e Kosovës dhe atje janë disa nga materialet gjatë aktivitetit 10 vjeçar të zonave mbrojtëse të Shtabit të përgjithshëm të TMK-së, që përfshijnë plane operacionale, raporte vjetore dhe aktivitete të ndryshme të punës që është bërë gjatë viteve.

”Gjithçka rreth TMK-së, asnjë letër për UÇK-në”, tha Syla.

Safet Syla ka qenë dëshmitar i ftuar në Gjykatën Speciale për të dëshmuar rreth aktivitetit të tij, gjatë sherbimit në UÇK.

Intervistimi i tij ka zgjatur dy ditë nga nëntë orë, gjithsej 18 orë.