Prioritetet e Kastratit për komunën e Kamenicës

Kandidati i Vetëvendosjes për kryetar të Kamenicës, Qëndron Kastrati, në një përballje  në Telegrafi.com me kundërkandidatin e tij nga radhët e LDK-së, Shaip Surdullin, ka treguar prioritetet e tij për komunën e Kamenicës.

Kastrati ka thënë se ka tri çështje kryesore: ujin dhe kanalizimin, arsimin dhe shëndetësinë.

“Në komunën e Kamenicës ka ende probleme me ujin dhe kanalizimin, gjatë mandatit tim do t’i shtrijmë rrjetet e ujësjellësit dhe kanalizimit. Pastaj tek arsimi i cili deri më tash ka shërbyer në interes të partive politike e kjo nuk do të ndodhë më. Nuk do të ketë më nxënës të uritur, pra do të ketë shujta falas dhe dollap personal për secilin nxënës, kontroll sistematike mjekësore në çdo shkollë, si dhe përzgjedhja e mësimdhënësve  dhe drejtorëve do të bëhet në bazë të njohurive të tyre e jo në bazë të interesave partiake”, ka thënë Kastrati.

Ai më tej ka thënë se sa i përket sektorit të shëndetësisë do ta rregullojnë problemin për mungesën e barnave esenciale.

“Në Kamenicë kemi probleme me materiale shëndetësore dhe barna esenciale e që shpesh ndodh që pacientëve tu kërkohet të blejnë edhe shiringa e me Vetëvendosjen kjo nuk do të ndodh. Do ta rifunksionalizojmë edhe gjinekologjinë”, u shpreh Kastrati. /Telegrafi/