Një numër destinacionesh në të gjithë botën kanë filluar t’u ofrojnë turistëve vaksinën kundër COVID-19.

Pothuajse një miliard njerëz tani janë plotësisht të vaksinuar globalisht, por qeveritë e huaja janë të etura të përdorin furnizimet e tyre për të trajtuar plagët e turizmit të krijuara nga një vit i vështirë për udhëtimet ndërkombëtare, shkruan euronews, përcjell Telegrafi.

Jashtë Evropës, shumë vende po shkojnë një hap më tej sesa parashikimet e krijuara drejt Certifikatës Digjitale për Covid-19 të BE-se (EUDCC), e cila lejon udhëtime ndër-kontinentale pas provës së vaksinimit dhe një testi negativ.

Madje ekzistojnë iniciativa në disa vende që përfshijnë një vaksinë në çmimin e akomodimit tuaj.

Më poshtë ua sjellim katër nga disa vendet që ose planifikojnë, ose aktualisht, ofrojnë vaksinime kundër COVID-19 për turistët:

Shtetet e Bashkuara të Amerikës

Disa qytete të SHBA-së u ofrojnë vizitorëve mundësinë për t’u vaksinuar duke përdorur dozën e vetme të Johnson&Johnson, pa termin.

Në fakt, qyteti i Nju Jorkut ka ofruar doza përmes qendrave të vaksinimit në monumente të tilla si Times Square që nga maji.

Edhe shteti i Alaskës ka ndjekur të njëjtën gjë, me Drejtoren e Shëndetit Publik, Heidi Hedberg që konfirmon se vizitorët mund të marrin një dozë të Pfizer ose Moderna ndërsa mbërrijnë në aeroportet në të gjithë shtetin.

Shtete të tjera po përdorin tepricën e tyre duke ofruar vaksina për turistët në Arizona, Florida, Luiziana dhe Texas.

Maldivet

Autoritetet e turizmit kanë konfirmuar që pasi popullsia vendase e këtij ishulli të jetë vaksinuar plotësisht ata do të hapin një skemë “Vizito, Vaksinohu, Pusho” që ofron injeksione për ata që nuk i kanë marrë ende.

Maldivet janë zakonisht një qendër pushimi dhe relaksimi për miliona vizitorë të pasur gjatë gjithë vitit dhe ka arritur të mirëpresë mbi 400,000 njerëz vetëm këtë vit.

Megjithëse kjo skemë mund të mos vijë në kohë për periudhën e verës së Evropës – Maldivet kanë vaksinuar gati 41 për qind të popullsisë së saj të rritur – kështu që sigurisht që do të jetë gati në kohë për sezonin më të ngrohtë në mars dhe prill të vitit të ardhshëm.

Emiratet e Bashkuara Arabe

Turistët kanë qenë në gjendje të marrin një dozë të Pfizer ose Sinopharm në kryeqytetin e Emirateve, Abu Dhabi, që nga qershori.

Rezervimet mund të bëhen përmes aplikacionit COVID-19 të vendit duke futur informacionin e pasaportës që vërteton statusin tuaj të vizitorit duke e lidhur atë me vizën tuaj turistike.

Bali, Indonezi

Ky ishull ka bërë shumë përpjekje për të inkurajuar turistët të kthehen në plazhet e tij ikonike – Bali së shpejti do të ofrojë paketa pushimesh që përfshijnë një dozë vaksine me strehimin dhe udhëtimin tuaj.

Indonezia aktualisht është në numrin më të lartë të rasteve me COVID-19 deri më tani, kështu që një datë fillimi për këtë iniciativë qëndron në duart e presidentit të saj, Joko Widodo.

Vizitorëve do t’u jepet një dozë ose e AstraZeneca ose Sinopharm e cila pritet të përfshihet në çmimin e pushimeve të tyre. /Telegrafi/