“Këtë takim e kam kërkuar shumë pas ndarjes dhe nuk ndodhi”, Egli pritet me përqafime nga Olsi Bylyku – Gjesti stepet

Mbrëmja e së martës në Big Brother VIP Albania 4 solli një moment të papërsëritshëm për banoren Egli Tako, pas transmetimit të videos me linjën e saj të jetës.

Ajo u ftua të shkonte në dhomën e surprizave, ku e priste një nga figurat më të rëndësishme të së kaluarës së saj — ish-partneri Olsi Bylyku.

Takimi i tyre u zhvillua në një atmosferë miqësore dhe të ngrohtë. Dyshja, të cilët dikur ishin ndër çiftet më të përfolur të showbizit shqiptar, shkëmbyen një përqafim të sinqertë, duke reflektuar respekt dhe vlerësim të ndërsjellë, pavarësisht ndarjes dhe rrugëve të ndryshme që kanë ndjekur në jetë.

“Të ndjek çdo ditë, u kënaqa. Ajo që më ka befasuar më shumë është mirënjohja që ke pasur. Në fakt jam shumë falënderues dhe besoj që ndoshta marrëdhënia jonë që kemi pasur u bë pak më e madhe sesa ne vetë”, u shpreh Olsi me emocion gjatë takimit.

Nga ana tjetër, Egli u duk e prekur dhe e befasuar nga ky moment i papritur. “Kur jam ndarë, e kam kërkuar shumë këtë takim që të ndodhte dhe nuk ndodhi kurrë. Dhe se si po më duket që po ndodh këtu tani… ndaj jam pak e konfuzuar sepse nuk e prisja fare, fare këtë takim këtu,” i tha ajo Olsit pas përballjes.

Ky moment preku jo vetëm Egli-n dhe Olsin, por edhe publikun që e ndoqi me vëmendje dhe emocion.

Takimi u vlerësua si një shembull i pjekurisë dhe respektit mes dy ish-partnerëve, duke treguar se ndarjet nuk duhet të sjellin përçarje, por mund të shërbejnë si bazë për një miqësi të sinqertë dhe të qetë. /Telegrafi/