KESCO: Prodhimi vendor i energjisë elektrike vazhdon të jetë i kufizuar, qytetarët të ndihmojnë në kursimin e energjisë

KESCO njofton publikun se prodhimi vendor i energjisë elektrike vazhdon të jetë i kufizuar.

Në njoftimin e bërë për media thuhet se njësia A3 është duke prodhuar rreth 110 megavatë sot, ndërsa pjesa tjetër e kërkesës do të mbulohet përmes importit të energjisë, transmeton Telegrafi.

“Në të njëjtën kohë, konsumi i përgjithshëm ka shënuar rritje gjatë ditëve të fundit, kryesisht për shkak të përdorimit më të madh të kondicionerëve si pasojë e temperaturave të larta. Për të siguruar furnizim të qëndrueshëm dhe pa ndërprerje, KESCO ka siguruar importet e nevojshme nga tregjet ndërkombëtare dhe po vazhdon të punojë intensivisht për të përmbushur nevojat në rritje për energji”, thuhet në njoftimin e KESCO.

Lexo po ashtu Reagon sërish KEK-u: Operimi i njësive tona prodhuese po vazhdon normalisht dhe nuk ka asnjë kolaps prodhimi

Tutje, KESCO ka bërë thirrje që të gjithë konsumatorët të ndihmojnë në kursimin e energjisë, veçanërisht përmes përdorimit më efikas të pajisjeve për ftohje.

“Çdo kilovat-orë i kursyer ndihmon në lehtësimin e ngarkesës në sistem dhe ul koston e përgjithshme të energjisë — duke përfituar të gjithë nga kjo”, vijon njoftimi./Telegrafi/