Kandidati për kreun e CIA-s shpall Kinën kërcënimin më të madh për SHBA

Kina paraqet kërcënimin më të madh për Shtetet e Bashkuara, tha të mërkurën kandidati i Joe Biden për drejtorin e CIA-s William Burns, duke premtuar se agjencia e inteligjencës amerikane do të ishte e pavarur nga politika.

Në skenën ndërkombëtare, “gjithnjë e më kompleks dhe konkurrues”, qëndrimi “grabitqar” i qeverisë kineze paraqet “sfidën tonë më të madhe gjeopolitike”, tha ish-diplomati gjatë një seance para komitetit të inteligjencës në Senat, i cili pritet të konfirmojë emërimin e tij.

“Siç vuri në dukje presidenti Biden, një avantazh mbi Kinën është thelbësor për sigurinë tonë kombëtare për dekadat e ardhshme. Kjo kërkon një strategji afatgjatë, të qartë dhe me mbështetjen e të dy palëve, me mbështetjen e reformave të brendshme dhe me inteligjencë të besueshme”, tha Burns, 64-vjeç.

CIA ka qenë në shënjestër të inteligjencës kineze vitet e fundit, e cila ka rekrutuar më shumë agjentë dhe diplomatë. Dhjetë vjet më parë, Pekini arriti të thyejë rrjetin e informatorëve të agjencisë amerikane të inteligjencës në Kinë

Burns theksoi se beteja për epërsinë teknologjike në fushën e inteligjencës, duke përfshirë inteligjencën artificiale, do të jetë një element kryesor i misionit të tij.

Williams Burns do të zëvendësojë Gina Haspel, gruaja e parë në krye të CIA-s, karriera e së cilës është njollosur nga roli i saj i diskutueshëm në programet e torturave pas sulmeve të 11 shtatorit.