Kafka e një dinosauri të zbuluar në Dakotën e Jugut pritet të shitet për 15 milionë dollarë

Një kafkë e një dinosauri Tyrannosaurus Rex e zbuluar në Dakotën e Jugut pritet të shitet për 15 milionë dollarë ose më shumë në një ankand në Nju Jork muajin e ardhshëm, thanë zyrtarët e Sotheby’s të martën.

Fosili i kafkës prej 91 kilogramësh, me nofkën Maximus, do të shitet më 9 dhjetor nga një pronar që dëshiron të mbetet anonim, tha shtëpia e ankandit.

Kafka u gërmua në vitin 2020 dhe 2021 në Harding County, Dakota e Jugut, ku u gjetën skelete të tjera T. rex si Sue dhe Stan, sipas Cassandra Hatton, drejtuese e shkencës dhe kulturës popullore të Sotheby.

Ajo e quajti zonën “kryeqyteti botëror për T. Rexes”, raporton AP, transmeton Telegrafi.

Shumica e pjesës tjetër të mbetjeve të këtij T. Rex u shkatërruan me kalimin e kohës nga erozioni, por ekspertët e Sotheby’s thanë se kafka ishte një gjetje e madhe.

Hatton deklaroi: “Kur mendoni për këtë, më shumë njerëz mund të vendosin një kafkë në shtëpinë e tyre sesa njerëz që mund të vendosin një dinosaur të plotë”.

Fosili 2 metra i gjatë është rreth 76 milionë vjet i vjetër dhe ka ende shumicën e kockave të jashtme të kafkës dhe dhëmbëve të shumtë, thanë ekspertët e Sotheby.

Hatton tha se dy vrima të mëdha shpuese në kafkë janë dëshmi e një lufte të madhe, ndoshta me një tjetër T. Rex.

“Ne nuk e dimë se kjo është ajo që shkaktoi vdekjen e kësaj kafshe, por mund të themi se ajo pati një betejë të madhe gjatë jetës së saj”, tha ajo.

Shenjat në kafkë janë interesante për t’u studiuar “sepse ato na japin një ide se si ishte jeta gjatë periudhës së Kretakut”, tha Hatton. /Telegrafi/