Jasharaj tregon çka përmban Kontrata e re kolektive për arsimtarët

Rrahman Jasharaj, Kryetar i Sindikatës së Bashkuar të Arsimit, Shkencës e Kulturës (SBASHK) ka treguar për KALLXO.com përmbajtjen e kontratës së re dhe ndryshimet që do t’i ketë nga ajo e vjetra.

Jasharaj tha kontrata e re do të përfshijë të gjithë punëtorët e arsimit e jo vetëm ata të arsimit parauniversitar.

“Kontrata e re është për gjithë punëtorët arsimit që nënkupton dallon nga kontrata aktuale sepse e ka të përfshirë edhe Universitetin. Çështjet që kanë qenë të mbrojtura me kontratën e vjetër si pagat përcjellëse do te jenë edhe tash. Kësaj radhe është vendosur që kontrata t’i përfshijë edhe punëtorët e arsimit të lartë”, deklaroi Jashari.

Kontrata kolektive e punëtorëve të arsimit që ishte nënshkruar nga ish-Ministri i Arsimit Ramë Buja në vitin 2014 skadoi më 11 prill të këtij viti.

Me këtë kontratë përveç të tjerash i mundësohej pensionistëve që t’i marrin deri në 6 paga në emër të pagave përcjellëse dhe asaj jubilare.

Me skadimin e kësaj kontrate SBASHK kishte paralajmëruar greva nëse një e re nuk nënshkruhet megjithëse patën ankesa për moszbatimin e kontratës paraprake.

Megjithatë sipas Jasharit presioni  me paralajmërimin e  grevës nuk ka qenë faktori i vetëm për arritjen e kontratës së re.

“Unë ma tepër do të thoja se ditëve të fundit është për t’u lavdëruar angazhimi i kabinetit i ministrit Bajrami jo për shkak se ne kemi bërë presion me greva. Besoj që një angazhim i tillë do të vërehet edhe në të ardhmen”, tha Jasharaj për KALLXO.com

Kontrata që planifikohet të nënshruhet nesër do të jetë e vlefshme për 3 vite sipas ligjit të punës.