BE-ja vendos sanksione të reja ndaj Bjellorusisë pas rastit me gazetarin Raman Pratasevich

Bashkimi Evropian ka vendosur të ndalojë linjat ajrore bjelloruse nga hapësirat ajrore evropiane pas devijimit të aeroplanit për në Minsk të dielën ku u arrestua gazetari, Raman Pratasevich.

Sipas BBC, përcjell Telegrafi, në një takim në Bruksel, udhëheqësit e 27 vendeve anëtare gjithashtu iu thanë linjave ajrore të BE-së të mos zhvillojnë fluturime në Bjellorusi dhe premtuan sanksione të mëtejshme ekonomike.

Roman Pratasevich, 26-vjeçar, ishte në një fluturim nga Greqia për në Lituani, derisa ky fluturim iu devijua pas një supozimi për sulm bombe.

Vendet perëndimore me këtë rast e akuzuan Bjellorusinë për “rrëmbimin” e avionit të linjës Ryanair.

Pratasevich ishte një administrator kryesor i kanalit Telegram NEXTA-Live, i cili ka qenë duke mbuluar protestat që shpërthyen në Bjellorusi për shkak të rezultatit të zgjedhjeve presidenciale.

Në muajin nëntor, autoritetet bjelloruse njoftuan se Pratasevich së bashku me Stsyapan Putsila – gjithashtu një administrator i NEXTA Live – po hetoheshin për dyshime për organizimin e çrregullimit masiv, prishjen e rendit shoqëror dhe nxitjen e urrejtjes shoqërore.

Bjellorusia është vërshuar nga protestat që kur Lukashenko, në pushtet që nga viti 1994, u shpall fitues i zgjedhjeve mes akuzave për manipulim të votave.

Që nga ajo kohë, më shumë se 30 mijë njerëz janë arrestuar, qindra janë rrahur ose torturuar, dhe gazetarët kanë qenë në cak të regjimit të Lukashenkos, qeveria e së cilës është goditur nga sanksionet e vendeve perëndimore. /Telegrafi/