Ishte raportuar se janë tërhequr nga Ukraina, inteligjenca ushtarake e Kievit pretendon se mercenarët e Wagnerit janë dërguar në Avdiivka

Rusia është duke dërguar ish-mercenarët e Wagnerit në afërsi të Avdiivkas në rajonin e Donetskut, që së fundmi ka rënë në “duart” e forcave të Moskës, kështu të paktën pretendojnë nga inteligjenca ukrainase, që thonë se kanë të njëjtën qasje që e kishin në luftime brutale në rajone tjera, shkruan Newsweek.

Zëvendës-shefi i inteligjencës ushtarake të Ukrainës, gjeneral-major Vadym Skibistskyi, tha se Rusia po krijon korpus të vullnetarëve prej më shumë se 18 mijë trupash, transmeton Telegrafi.

“Kjo përfshin ish-mercenarët e Wagnerit që tani po menaxhohen nga ministria ruse e Mbrojtjes”, tha ai për Interfax Ukraine.

Lexo po ashtu Zelensky: Mendoj se Donald Trump nuk e njeh Putinin

“Ata tani po operojnë në rajonin e Avdiivkas”, shtoi ai duke iu referuar qytetit nga i cili u tërhoqën trupat ukrainase pas disa muajve luftimet të ashpra, që i shkaktuan rusëve humbje të mëdha.

Zyrtarët ushtarakë të Ukrainës vlerësojnë se deri në 47 mijë rusë janë vrarë apo plagosur në luftimet e ashpra në Avdiivka, një shifër shumë më e lartë sesa ajo prej 25 mijë ushtarëve sovjetë që ishin vrarë në luftën e Afganistanit, që zgjati nga viti 1979 deri më 1989.

Skibitskyi tha se mercenarët e Wagnerit janë dërguar atje për shkak të përvojës në luftime, dhe se “ata po përdorin të njëjta metoda sikurse që Wagneri i përdori në Bakhmut”.

“Sa i përket pagave, ata marrin të njëjtën shumë sikurse ushtarët e ushtrisë ruse. Por Wagner kishte paga më të mëdha dhe instruktorët dhe komandantët e tyre vlerësoheshin më shumë”, shtoi ai.

Ishte raportuar se mercenarët e Wagner-it ishin tërhequr nga Ukraina pas dështimit për të kryer një grushtshtet në Rusi, dhe vdekjes së kreut të këtij grupi Yevgeny Prigozhin. /Telegrafi/