Qeveria e Kosovës duhet ta vizitojë selinë e NATO-s dhe të shohë pritjet për anëtarësim të Kosovës.

Kështu u shpreh në seancën e sotme të Kuvendit, deputeti i PDK-së, Enver Hoxhaj. Ai theksoi se mbrojtja e vendit fillon nga jashtë.

“Aplikimi do të mund të bëhej dhe të përmbushej brenda një kohe të shkurtër, sikurse edhe një koordinim me partnerët tanë. Nëse ne kemi pasur prirje se një marrëveshje Kosovë-Serbi, duhet ta sjellë një njohje të ndërsjellë, kjo është shumë e largët duke parë situatën në Ukrainë, anëtarësimi i Kosovës në NATO do të duhej të ishte prioritet mbi prioritete gjatë 2022”, u shpreh Hoxhaj.

E kësaj deklarate i është përgjigjur, ministri i Financave, Hekuran Murati. Ministri theksoi se Qeveria po punon në adresimin e kërkesave.

“Ne si Qeveri po bëjmë që këto kohë t’i adresojmë kërkesat tona edhe të paraqesim situatën. Po bëjmë gjithçka që është e mundur, pajtohem edhe me një thënie të deputetit Hoxhaj se duhet të dëgjojmë e jo vetëm të flasim”, tha ai. /Telegrafi/