Hoxha: Qeveria të dëgjojë zërin e ndërtuesve, shumë sektorë tjerë lidhen me ndërtimin

Kryetari i Shoqatës së Ndërtuesve të Kosovës, Faton Hoxha ka thënë se qeveria duhet të dëgjojë zërin e ndërtuesve pasi sipas tij me këtë sektorë janë të lidhur edhe shumë sektorë tjerë.

Hoxha në RTV Dukagjini ka thënë se në bazë të hulumtimit të bërë nga Oda Ekonomike e Kosovës, sektori i ndërtimit do të ndikohet deri në masën 75% për shkak të pandemisë.

Kryetari i Shoqatës së Ndërtuesve të Kosovës thotë se qeveria sektorin e ndërtimit as që e ka zënë në gojë, përcjell Telegrafi.

“E vetmja masë në ndihmë të ndërtimtarëve ka qenë ajo nga Komuna e Prishtinës që kanë bërë shtyrjen e pagesës së kësteve për leje të ndërtimit dhe asgjë tjetër”.

Hoxha thotë se objektet e filluara do të përfundohen së ndërtuari por sipas tij indikacionet janë që do të bie fuqia blerëse me ç’rast sipas tij do të ketë edhe rënie të punësimit.

“Dihet se në Kosovë sektori i ndërtimit përbën 12.9 % të gjithë të punësuarve”.

Kryetari i Shoqatës së Ndërtuesve të Kosovës thotë se do të propozohen disa masa në mënyrë që të mos kolapsojë sektori i ndërtimit.

“Nëse kolapson sektori i ndërtimit do të pësojnë edhe disa sektorë të tjerë që janë të lidhur direkt apo indirektë me këtë sektor…Qeveria dhe gjithë aktorët në këtë mes të ulen dhe të dëgjojnë zërin tonë. Nuk kemi nevojë të zbulojmë asgjë por të marrim masat si në vendet e rajonit dhe vendet tjera edhe gjatë krizës së vitit 2008”, tha ndër të tjera Faton Hoxha./Telegrafi/