Hoti i reagon Muratit: Prezantimi si sukses i suficitit buxhetor në krizën e inflacionit, është naivitet

Deputeti i LDK-së, Avdullah Hoti ka reaguar ndaj deklaratës së ministrit të Financave, Hekuran Murati, pasi që ky i fundit është lavdëruar me menaxhimin e financave publike gjatë vitit 2022.

Murati tha se deficiti buxhetor është zvogëluar në rekord historik.

E për deputetin e LDK-së, Avdullah Hoti prezantimi i suficitit buxhetor si sukses, është naivitet.

“Të prezantohet si sukses suficiti buxhetor në kohën e krizës së inflacionit dhe krizës energjetike është naivitet. Sikur të kishim rritje ekonomike 10%, ndoshta edhe do të kishte kuptim suficiti buxhetor”, ka shkruar Hoti.

Lexo po ashtu Murati flet për rekord historik: Financat publike janë kthyer në binarë, thesi i shqyer është qepur

Hoti ka thënë se në situatën kur pagat nuk rriten dhe bllokohen miliona euro të investimeve kapitale, sigurisht se buxheti del në suficit.

Murati kishte shkruar se “Financat publike janë kthyer në binarë dhe thesi i shqyer është qepur”.

Ai përmes një grafikoni ka bërë të ditur se deficiti buxhetor është zvogëluar në vetëm -46.1 milionë euro gjatë vitit të kaluar.

“Jemi kujdesur që të mos shkaktojmë barrë të paqëndrueshme financiare e të mos rrisim borxhin publik, përkundër faktit që kishim pakot mbështetëse më voluminoze në rajon”, ka shkruar tutje Ministri i Financave. /Telegrafi/