Hoti: Nuk do të tolerohen inspektime selektive ndaj qytetarëve dhe bizneseve që shkelin masat

Kryeministri i Kosovës, Avdullah Hoti ka paralajmëruar inspektorët se nuk do të tolerojë që të jenë selektiv ndaj atyre që nuk i respektojnë masat e marra nga Qeveria e Kosovës, për parandalimin e përhapjes së COVID-19.

Hoti përmes një postimi në Facebook, ka thënë se do të shtojnë numrin e inspektorëve sanitar dhe nuk do të ketë tolerancë ndaj shkelësve të masave.

Në lidhje me këtë, i pari i Qeverisë tha se do të ketë nesër një raport me shkrim.

“Me shqetësim pranova informatën se ne raste te caktuara, inspektoret janë selektiv ndaj atyre qe nuk respektojnë masat. Kjo nuk do te tolerohet. Nesër do te kem raport me shkrim nga institucionet përkatëse”, shkruan Hoti.

Postimi i plotë: 

Sot, në konsultimin që kisha me policinë, inspektoratin sanitar, Ministrinë e Shëndetësisë, institucionet tjera ndihmëse dhe nivelin komunal, jam informuar për aktivitetet në teren në mbikëqyrje të zbatimit të masave. I falënderova për angazhimin dhe kërkova të zbatohen masat PA PARDON.

Shumë shpejt do ta rrisim prapë numrin e inspektorëve sanitar. Nuk do të këtë tolerance ndaj shkelësve të masave që po rrezikojnë jetën e qytetarëve, e as ndaj atyre që nuk respektojnë inspektoratin dhe policinë duke i penguar në kryerjen e detyrës.

Me shqetësim pranova informatën se në raste te caktuara, inspektoret janë selektiv ndaj atyre që nuk respektojnë masat. Kjo nuk do të tolerohet. Nesër do të kem raport me shkrim nga institucionet përkatëse. /Telegrafi/