Hoti sërish flet për rastin në Karaçevë: Kufijtë e Kosovës janë të sigurt, s’ka nevojë për deklarata pompoze e defilime në vendngjarje

Kryeministri i vendit, Avdullah Hoti ka reaguar sot sërish lidhur pas rastit në Karaçevë të Kamenicës, duke thënë se ka biseduar me komandantin e KFOR-it, Michele Risi dhe se siguria në Kosovë nuk mund të rrezikohet nga askush.

Hoti në një postim në rrjetin social Facebook shkruan se nuk ka vend për panik, dhe as nevojë për deklarata pompoze e defilime në vendngjarje, pa pasur idenë se si ka ndodhur ngjarja.

Lexo po ashtu Shqetësohen banorët e Karaçevës, xhandarmeria serbe filmohet nga kamerat e sigurisë duke kaluar në parkingun e një restoranti

Lexo po ashtu Pas hyrjes së xhandarmërisë serbe, Haradinaj shkon në Karaçevë: Nuk duhen lejuar provokime të tilla

Lexoni të plotë postimin e Hotit:

“Lidhur me ngjarjen e djeshme, sot Ministri i Punëve të Brendshme është takuar me Komandantin e KFOR-it, Gjeneralin Risi, me të cilin kam komunikuar edhe vetë mbrëmë dhe sot. Në këtë takim është sqaruar se si ka ndodhur kjo ngjarje. Kam qenë në komunikim edhe me Kryetarin e Kamenicës, z.Qendron Kastrati, me të cilin së shpejti do të vizitojmë qytetarët tanë në ato fshatra.

Siguria në Kosovë nuk mund të rrezikohet nga askush. Nuk ka vend për panik, dhe as nevojë për deklarata pompoze e defilime në vendngjarje, pa pasur idenë se si ka ndodhur ngjarja.

Kufijtë e Republikës së Kosovës janë të sigurt dhe të njohur ndërkombëtarisht nga pjesa më e fuqishme dhe demokratike e botës.

Në ditët në vijim do të merren veprime konkrete nga institucionet e sigurisë së Kosovës, në koordinim me mekanizmat ndërkombëtarë të sigurisë, përfshirë këtu patrullimet e përbashkëta me KFOR-in.

Dëshiroj të falënderoj Gjeneralin Risi për bashkëpunimin e ngushtë në vazhdimësi”. /Telegrafi/