Haxhiu takoi homologun nga Danimarka, diskutuan për marrëveshjen përfundimtare për dhënien me qira të 300 qelive nga Kosova

Ministrja e Drejtësisë, Albulena Haxhiu ka pritur sot në takim homologun nga Mbretëria e Danimarkës, ministrin e Drejtësisë, Nick Hakkerup.

Haxhiu, duke iu uruar mirëseardhje ministrit Hakkerup dhe delegacionit danez, shprehu mirënjohjen për bashkëpunimin korrekt të Mbretërisë së Danimarkës, duke i cilësuar si aleat tejet të vlefshëm, veçmas për gatishmërinë e tyre për të ndihmuar Republikën e Kosovës në fushën e drejtësisë penale.

“Palët konfirmuan përparimin në negociatat për arritjen e marrëveshjes përfundimtare për transferimin e të dënuarve nga Danimarka në Kosovë e cila pritet të nënshkruhet dhe të ratifikohet në Kuvendin e Republikës së Kosovës gjatë këtij viti”, thuhet në njoftimin për media.

Lexo po ashtu Marrëveshja me Danimarkën për të burgosurit, ministrja Haxhiu jep detajet

Më tej në njoftim thuhet se partneriteti i tillë, në mes të Republikës së Kosovës dhe Mbretërisë së Danimarkës, ishte pjesë e këtij diskutimi, me ç’ rast nga të dy anët u shpreh vullnet për të bashkëpunuar për interesat e qytetarëve të të dy palëve, në zhvillimin dhe avancimin edhe për interesa tjera vitale.

“Partneriteti i fuqishëm në sektorin e drejtësisë, investimet e rëndësishme në fushën e energjisë, janë garanci për zgjerim të bashkëpunimit edhe në fushat tjera”, thuhet në njoftim. /Telegrafi/