Haradinaj: Më shumë ju besoj deputetëve të pozitës për ndaljen e Demarkacionit, se gazit lotsjellës

Deputeti nga radhët e Aleancës për Ardhmërinë e Kosovës, Daut Haradinaj ka thënë se hedhja e gazit lotsjellës në Kuvendin e Kosovës, parandaloi krijimin e “Zajednicës” dhe kalimin e Demarkacionit.

“Gazi e ndali “Zajednicën” edhe Demarkacionin. Vetëdijesimi i deputetëve është shumë i lartë tash. Ka deputet në koalicionin qeverisës se në asnjë variant nuk do t’ia ja japin besimin këtij Demarkacioni”, ka thënë Haradinaj në RTK, transmeton Telegrafi.

Haradinaj ka theksuar se ai i beson më shumë në deputetët e pozitës në këtë rast që do të votojnë kundër Demarkacionit sesa instrumentit gaz.

Duke folur për mundësinë e mbajtjes së zgjedhjeve të parakohshme në Kosovë, Daut Haradinaj theksoi se këto zgjedhje janë shans që Kosova të marrë drejtim tjetër për shkak se sipas tij, koalicioni PDK- LDK nuk është parimor.

“Ky koalicion nuk është parimor, besoj se këtyre ju mungon guximi për vendimmarrje. Duhet të vijnë burra që nuk ju frikësohen vendimeve edhe nëse nuk janë të lehta”, tha Haradinaj./Telegrafi/