“Gylenisti” kërkon azil në Shqipëri

Në Shqipëri shtetasi turk Selami Simsek, i arrestuar vitin e kaluar në aeroportin “Nënë Tereza” me dokumenta fallso, ka kërkuar azil duke deklaruar se ndjehet i pasigurt të kthehet në Turqi

Në një letër drejtuar autoriteteve të kufirit, të shkruar në turqisht dhe shqip, ai shpjegon se në Turqi atë e konsiderojnë pjesë të lëvizjes Gulen e për pasojë “atje mund t’i nënshtrohet veprimeve keqtrajtuese”, shkruhet në kërkesn e tij.

Përfaqësues të ambasadës turke ishin të pranishëm në sallën e gjyqit në seancën e parë që u mbajt në Gjykatën e Tiranës.

Turku Simsek, duket se ka zgjedhur këtë rrugë për të shmangur fatin që pati bashkëkombasi i tij Harun Çelik. Të dy u arrestuan në të njejtën ditë dhe për të njejtin motiv, raporton Zëri i Amerikës.

Ndaj Çelik, autoritetet shiptare vepruan me urgjencë duke e dëbuar atë nga Shqipëria, sapo doli nga burgu, e pa i lënë asnjë mundësi që të bënte ankim, siç parashikojnë vetë ligjet shqiptare.

Ndonëse dhe Çelik tentoi të kërkonte azil, madje dhe në momentet e fundit para largimit nga Shqippëria, autoritetet pohuan se nuk ka patur një kërkesë me shkrim për azil, ndërkohë që legjislacioni shqiptar parashikon se “Kërkesë për azil” është çdo deklaratë e të huajit ose personit pa shtetësi, e shprehur në çfarëdolloj mënyre e në çfarëdo kohe”.