Gjykata Themelore në Gjilan ia zgjat paraburgimin policit që dyshohet për vrasjen e qytetarit nga Kamenica

Ngjarje e rëndë kishte ndodhur mëngjesin e 29 dhjetorit 2019 në qytetin e Kamenicës, pasi i ndjeri Lulzim Spahiu dyshohet se u qëllua me armë zjarri nga i pandehuri zyrtar policor, Vllaznim Hamdija. Ngjarja e rëndë ndodhur pas një aksidenti me automjete.

Gjykata Themelore në Gjilan, kishte vendosur masë paraburgimi ndaj zyrtarit policor, masë e cila u vendos këtë të hëne që të vazhdohet edhe për dy muaj të tjerë.

Këtë e ka konfirmuar për Telegrafin zëdhënësi i Gjykatës Themelore në Gjilan, Sabit Shkodra.

Sipas tij, seanca e radhës për të pandehurin zyrtarin policor do të mbahet më 20 tetor të këtij viti.

“Gjykata Themelore, Gjilan më datë 21.09.2020, ka nxjerrë aktvendim me anë të cilit të pandehurit në fjalë, iu është vazhduar masa e paraburgimit deri më datë 20.11.2020, deri në muajin nëntor. Ndërsa seanca gjyqësore do të mbahet 20.10. 2020, në orën 10:00”, ka thënë  Shkodra.

Ndryshe, u bën nëntë muaj, që i pandehuri është duke qëndruar në paraburgim nën dyshimin se mëngjesin e së shtunës së 29 dhjetorit të vitit 2019 ka vrarë me armë zjarri Lulzim Spahiun. Ngjarja kishte ndodhur për shkak të një aksidenti trafiku që kishte ndodhur në mes të viktimës dhe të dyshuarit. /Telegrafi/