Gjermania forcon ushtrinë, 100 miliardë euro do të jepen për armë

Gjermania planifikon të modernizojë ushtrinë e saj, me një prej investimeve më të mëdha në forcat e armatosura në historinë e këtij vendi.

Planifikohet një fond i veçantë prej 100 miliardë eurove për nevoja të ushtrisë pas pushtimit rus në Ukrainë, e pjesa më e madhe e parave do t’i takojnë forcave ajrore thuhet në një dokument të cilin e ka siguruar Reuters, transmeton Telegrafi.

Sipas këtij dokumenti, është parashikuar që 40.9 miliardë euro të shpenzohen në zhvillim të teknologjisë dhe blerjen e armëve – përfshirë porosinë e aeroplanëve luftarak EuroFighter Typhoon dhe F-35 si dhe ndërtimin e sistemit hapësinor për paralajmërim më të hershëm.

E nga paratë e mbetura, 19.3 miliardë euro janë dedikuar për marinën dhe 16.5 miliardë për blerjen e anijeve dhe nëndetëseve të reja, si dhe për zhvillimin e mjetit të ardhshëm për këmbësorinë siç është Marder.

Sot është raportuar se Gjermania do t’i dërgojë Greqisë mjete luftarake për këmbësori, me qëllim që qeveria në Athinë të mund t’ia dorëzojë Ukrainës armët e tipit sovjetik, ka njoftuar kancelari gjerman Olaf Scholz.

“Ne do t’i sigurojmë Greqisë mjetet luftarake për këmbësorinë”, tha Scholz para gazetarëve pas samitit dyditor të liderëve të BE-së në Bruksel, duke shtuar se ka arritur marrëveshje me kryeministrin grek, raporton Reuters. /Telegrafi/