Komandanti i Forcës së Sigurisë së Kosovës, Rrahman Rama, ka njoftuar presidentin e Kosovës, Hashim Thaçi, përmes një letre (mund ta shihni më poshtë) se Qeveria amerikane ka marrë vendim që të anulojë vizitën e gjeneralit amerikan të Gardës Nacionale të Iowas, Timothy Orr në Kosovë, në shenjë pakënaqësie me vendimin e Qeverisë së Kosovës, për vendosje të taksës në produktet e Serbisë dhe Bosnjë e Hercegovinës.
Në letrën e komandantit Rama, thuhet se zyrtarë amerikanë në Kosovë e kanë njoftuar atë se Washingtoni është duke shqyrtuar edhe masa të tjera, përfshirë këtu pezullimin e programeve trajnuese dhe edukative për FSK-në.
Lajmin për anulimin e vizitës së gjeneralit për shkak të taksës e ka konfirmuar për Radion Evropa e Lirë edhe Ambasada e Shteteve të Bashkuara në Prishtinë.
Ndërkaq, komandanti i Forcës së Sigurisë së Kosovës, gjeneral-lejtnant Rrahman Rama, në një bisedë me Radion Evropa e Lirë, ka theksuar se lidhur me anulimin e vizitës në Kosovë të gjeneralit amerikan Orr, përveç presidentit, e ka njoftuar edhe kryeministrin Ramush Haradinaj dhe ministrin e Mbrojtjes, Rrustem Berisha.
Anulimin e kësaj vizite, ai e ka cilësuar lajm jo të mirë për vendin.
“Realisht, nuk është një lajm i mirë. Definitivisht është anuluar vizita e gjeneralit në Kosovë. Orientimi ynë është i qartë dhe bashkëpunimi që e kemi pasur dhe që e kemi deri më tash, pra, falë angazhimit të tyre dhe përkrahjes së tyre, ne jemi këtu ku jemi. Por, nuk besoj që do të vijmë deri në atë masë që këto aktivitetet të anulohen. Është partner i jonë strategjik. Besoj që këto janë vendime politike dhe si pasojë e taksës që është ndaj Serbisë, është marrë ky vendim nga ana e Qeverisë të SHBA-së”, theksoi Rama.
Ai ka shtuar se bashkëpunimin i FSK-së me Gardën Nacionale (të Iowa-s) është një ndër partneritetet më të mira me Shtete e Bashkuara të Amerikës, jo vetëm në fushën ushtarake, por edhe në biznes, kulturë dhe edukim.
Lidhur me paralajmërimin e mundësisë së anulimit te trajnimeve dhe vizitave ushtarake në SHBA, gjeneral-lejtnant Rama shpreson që nuk do të arrihet deri në atë pikë.
“Këto më shumë janë tash çështje politike, të cilat mua nuk më takon që t’i komentoj. Paralajmërime ka pasur dhe tash ne presim se çka do të ndodhë. Por, gjithmonë jemi me shpresën që nuk do të ndodh dhe nuk do të arrijmë deri te ajo situatë”, ka thënë Rama.
Vizita e gjeneralit amerikan ishte paraparë të realizohet nga data 16 deri më 18 shkurt, për të shënuar 11 vjetorin e pavarësisë së Kosovës.
Qeveria e Kosovës ka vendosur taksë prej 100 për qind në importet e këtyre dy shteteve.
Erolld Belegu, këshilltar i kryeministrit të Kosovës, Ramush Haradinaj, duke folur për Radion Evropa e Lirë, thotë se Qeveria e Kosovës shpreh keqardhjen për anulimin e vizitës së gjeneralit Orr, por vendimi për taksën ndaj produkteve të Serbisë dhe Bosnjë e Hercegovinës, mbetet i pandryshuar.
“Ky është vendim vetëm i administratës amerikane, në të cilin nuk kemi ndikim. Arsyeja (e anulimit të vizitës) është cekur edhe në arsyetimin kur është anuluar vizita e gjeneralit Orr ka qenë për shkak të taksës. Ky është vendim sovran i Kosovës. Kosova është detyruar ta vendosë këtë taksë ndaj Serbisë dhe derisa rrethanat për të cilat është vendosur nuk kanë ndryshuar fare, Qeveria e Kosovës është zotuar që ta mbajë taksën në nivelin në të cilin është, duke shpresuar që ky do të jetë argument i mjaftueshëm që Serbia sa më shpejt të ulet në tavolinë dhe të diskutojë për gjërat e hapura me Kosovën”, ka thënë Belegu.
Ai ka shtuar se Kosova e dëshiron në vazhdimësi mbështetjen amerikane, por në rastin konkret, sipas tij, ekziston një mospajtim rreth mënyrës së të shkuarit drejt dialogut.
“Ne nuk mund të komentojmë qëndrimin e zyrtarëve amerikanë. Unë krejt çka mund të deklaroj në emër të Qeverisë së Kosovës, që taksa e cila është vendosur është vendosur kundër Serbisë dhe asnjë moment, kundër aleates më të madhe tonës, SHBA-së”, ka theksuar Belegu.
Kjo taksë, është parë nga SHBA-ja dhe BE-ja si pengesë për dialogun ndërmjet Kosovës dhe Serbisë.
Ambasada e Shteteve të Bashkuara ka thënë javë më parë përmes një deklarate se veprimet që minojnë dialogun, përbëjnë qëndrim kundër interesave të SHBA-së.
“Shtetet e Bashkuara insistojnë se veprimet që minojnë dialogun, pengesat nga anash, dhe refuzimi për të pezulluar tarifat – gjitha këto shkojnë kundër interesave të SHBA-ve”, ishte thënë në deklaratë.
Kjo masë është shfrytëzuar nga presidenti i Serbisë, Aleksandar Vuçiq si arsyetim për mosvazhdim të dialogut mes Kosovës dhe Serbisë, që zhvillohet me ndërmjetësimin e Bashkimit Evropian në Bruksel.
Përveç tjerash, edhe presidenti i Kosovës, Hashim Thaçi ka thënë të premten, pas një vizite që ka zhvilluar në SHBA, se Uashingtoni ka dhënë porosi të qartë se pa pezullimin e tarifës doganore nuk mund të vazhdojë dialogu në Bruksel.
Përndryshe, deklarata e ambasadës amerikane, nuk ka shënuar herën e parë që SHBA-ja ka kundërshtuar vendimin e autoriteteve të Kosovës.
Departamenti amerikan i Shtetit, ka bërë të ditur në muajin nëntor se Sekretari amerikan i Shtetit, Mike Pompeo u ka bërë thirrje autoriteteve të Kosovës që të heqin dorë nga kjo masë.
Më 8 maj të vitit të kaluar, në Kosovë kishte qëndruar një delegacion prej 50 anëtarësh nga Iowa e Shteteve të Bashkuara të Amerikës, në krye të së cilit ishte edhe Timothy Orr, Gjeneral i Gardës Kombëtare të Iowas.
Ai kishte thënë atëherë se në partneritetin me Forcën e Sigurisë së Kosovës, i cili kishte nisur në mars të vitit 2011, ishte ecur shumë përpara.
Partneritetin me Kosovën, gjenerali Orr e konsideronte më të mirin nga 77 partneritet që ka Iowa në të gjithë botën.
“Zemra ime do t’i takojë çdo herë Kosovës. Kjo është shtëpia ime e dytë”, pati theksuar gjenerali Orr.
Lufta Prigozhin - Putin
Më shumëU tregua e ashpër ndaj Vuçiqit në Këshill të Sigurimit - reagime të shumta në mbështetje të përfaqësues së Maltës
Joseph: Supriza e KS-së ishte se Kosova dhe Rusia u pajtuan për rëndësinë e fushatës ajrore të NATO-s, Putin e ka hedhur Serbinë nën autobus
UP-ja pezullon nga puna profesorin Xhevat Krasniqi që dyshohet për ngacmim seksual
Nënat e Srebrenicës falënderojnë presidenten Osmani: Një fjalim i tillë do të mbahet mend ndër breza
Haradinaj kërkon dorëheqjen e Qeverisë Kurti, pas publikimit të raportit nga DASH
Raporti i DASh-it, opozita e vlerëson shqetësues, pushteti mohon ndërhyrjet në sistem të drejtësisë
Investoni në të ardhmen tuaj – bli banesë në ‘Arbëri’ tani! ID-140
Shitet banesa në Fushë Kosovë në një vendodhje perfekte – 80.5m², çmimi 62,000Euro! ID-254
Ideale për zyre – në qendër të Prishtinës lëshohet banesa me qira ID-253
Bli shtëpinë e ëndrrave tuaja në Prishtinë – ZBRITJE në çmim, kapni mundësinë tani! ID-123
Krijo hapësirën tënde të biznesit – zyre me qira te 4 Llulat – 300€/muaj ID-252
E jotja është mu koncentru, e karriges Gaming me t’rahatu
Karrige që ta relakson mendjen dhe trupin
Knaqja zemrën vetit: Bli fustanin me zbritje në Melodia Px
Autobusi bon me t’ik, a kjo bluzë me zbritje hiç kërqysh!
Sako nga MelodiaPx që t’shton vetëbesim!
Më të lexuarat
Si Izraeli përdori dronët për të ngatërruar mbrojtjen ajrore iraniane përpara se të "gjuante raketat supersonike Rampage" - një sulm preciz që heshti Teheranin
Kryesuesja në KS të OKB-së përplaset ashpër me Vuçiqin për minutat e fjalimit
Përplasja e SHBA-së me Rusinë në KS të OKB-së: Nuk mund të ndryshoni historinë e intervenimit të NATO-s në Kosovë
Gjykimi për vrasjen e trefishtë në Gllogjan, dëshmitari tregon se çka i kishte thënë i akuzuari në natën kritike
Katër të mbijetuara të luftës nuk u lejuan të futeshin në sallën e KS të OKB-së, Osmani refuzoi pjesëmarrjen derisa lëshoi pe protokolli
"Ndoshta pse jam shqiptare", Dua Lipa zbulon një talent sekret që ka të bëjë me prejardhjen e saj