Garda Kombëtare e Ukrainës: Brigada legjendare është kthyer, duke kryer sërish detyra ushtarake

Brigada ushtarake “Azov” që mbrojti Mariupolin u kthye në front, njoftoi përfaqësuesi i Gardës Kombëtare të Ukrainës, koloneli Mykola Urshalovich.

“Brigada legjendare e Azov për qëllime speciale është rimëkëmbur dhe ka filluar detyrat ushtarake në zonën pyjore Serebryansk”, tha Urshalovich, transmeton Telegrafi.

Luftëtarët e Azov, shtoi ai, mbajnë me besueshmëri linjat e tyre dhe i shkaktojnë armikut humbje shkatërruese në personel ushtarak dhe pajisje.

Luftëtarët ukrainas, përfshirë ata nga Regjimenti Azov, mbajtën linjën në fabrikën Azovstal në Mariupol për gati dy muaj në pranverën e vitit 2022.

Lexo po ashtu Ukrainasit godasin me dron një ndërtesë në Moskë, autoritetet ruse ndërprenë trafikun ajror

Në mesin e majit, mbrojtësit e Azovstal, me urdhër të komandës, u larguan nga territori i fabrikës, shumë prej tyre u kapën nga rusët.

Në shtator, njerëzit që drejtonin mbrojtjen e Azovstal, duke përfshirë komandantin e Azov, Denis Prokopenko, u dërguan në Turqi sipas kushteve të një shkëmbimi të robërve të luftës midis Rusisë dhe Ukrainës. Ata duhej të qëndronin në Turqi deri në fund të luftës.

Sidoqoftë, në korrik 2023, komandantët e Azov u kthyen në Ukrainë së bashku me Volodymyr Zelensky, i cili po vizitonte Turqinë. Rusia ka akuzuar Turqinë dhe Ukrainën për shkelje të marrëveshjes.