Franca është goditur nga një sulm kibernetik i paprecedentë ndaj sektorit të saj të mbrojtjes, ku janë komprometuar të dhëna jashtëzakonisht të ndjeshme që lidhen me sigurinë kombëtare.
Sipas raportimeve të Financial Times, objektivi kryesor i sulmit ka qenë kompania shtetërore Naval Group, e specializuar në prodhimin e nëndetëseve dhe anijeve ushtarake.
Burime brenda hetimit konfirmojnë se hakerët kanë arritur të kenë qasje në informacione kritike, përfshirë:
Softuerin që kontrollon armët bërthamore të vendosura në nëndetëset franceze;
Dokumentacionin teknik për aeroplanët luftarakë Rafale-M, të përdorur nga forcat ajrore dhe detare të Francës;
E-mailet e brendshme të drejtuesve të kompanisë, si dhe të dhëna të rrjetit të brendshëm të komunikimit.
Ky sulm përbën një kërcënim serioz për sigurinë kombëtare franceze dhe ka ngritur shqetësime të mëdha në nivel ndërkombëtar.
Autoritetet franceze dhe amerikane kanë nisur një hetim të përbashkët dhe janë duke verifikuar vërtetësinë dhe shtrirjen e informacionit të komprometuar.
Deri më tani nuk është konfirmuar publikisht identiteti i grupit përgjegjës për sulmin, por burime të afërta me çështjen nuk përjashtojnë mundësinë e një sulmi të sponsorizuar nga shtete të huaja.
Ministria franceze e Mbrojtjes nuk ka dhënë ende një deklaratë zyrtare, por zyrtarë të lartë të qeverisë kanë konfirmuar se po merren masa urgjente për të kufizuar pasojat e incidentit dhe për të forcuar sigurinë kibernetike në infrastrukturën ushtarake të vendit. /Telegrafi/
