Fondacioni BONEVET pranon mirënjohje nga Komuna e Vitisë

Duke treguar sukses, ndikim pozitiv dhe rritje të pjesëmarrësve çdo vit në Garën e Robotikës – Kosova Makers League, që organizohet nga BONEVET, Komuna e Vitisë ka ndarë mirënjohje për nxënësit pjesëmarrës në këtë garë nga shkolla ‘’Dëshmorët e Vitisë’’. Zëvendës Kryetari i Komunës së Vitisë, Halit Aliu dhe Drejtori i Drejtorisë Komunale për Arsim, z. Basri Aliu kanë ndarë mirënjohje për nxënësit të cilët kanë treguar suksese dhe një mirënjohje e veçantë i është dedikuar edhe organizatës BONEVET e cila organizon gara të tilla, të cilën në emër të saj e ka pranuar mësimdhënësi Burim Jashari.

“Eksperienca ime në Garën e Robotikës – Kosova Makers League dhe e nxënësve në ekipet të cilat i kam mentoruar ka qenë e mrekullueshme dhe shumë e dobishme. Ajo që vlen të ceket është që djemtë dhe vajzat, nxënës që kanë marrë pjesë në dy vitet e kaluara tani më janë në shkollat e mesme profesionale, duke u orientuar në fushën e teknologjisë dhe duke synuar që të mbarojnë edhe studimet universitare në këtë lëmi. Që nga hera e parë kur është mbajtur Gara e Robotikës, është vërejtur një rritje e dukshme e interesimit të nxënësve për kodim, teknologji, eksplorim dhe inovacion, andaj kjo është edhe arsyeja që na mban të motivuar dhe aktiv për të vazhduar tutje”- Burim Jashari.

Marrë parasysh situatën aktuale me të cilën është duke u përballur mbarë bota, edhe Gara e Robotikës (KML) ka zhvendosur të gjitha aktivitetet fizike në ato online. Me qëllim që në asnjë moment të mos ndalet edukimi i fëmijëve, fillimisht ekipi entuziast i KML ka krijuar platformën KML Scratch Explorers, platformë kjo që i’u mundëson fëmijëve të mendojnë në mënyrë kreative dhe të krijojnë projektet e tyre online.

Me temën ‘’Udhëtimi i robotëve në hapësirë dhe kthimi i tyre në tokë’’, në shtator të këtij viti, Kosova Makers League filloi edicionin e tretë me radhë online. Kjo garë mbledhë fëmijë të shkollave fillore nga mbarë Kosova, të cikleve shkollore të ndryshme (klasët 1-5 dhe klasët 6-9), ku përmes gjuhës programuese Scratch atyre i’u kërkohet të programojnë dhe ndërtojnë robotët e tyre në mënyrë që t’i përgatisin ata për udhëtimin në hapësirë.

BONEVET falënderon Komunën e Vitisë për mirënjohjen e ndarë dhe gjithashtu përgëzon nxënësit e shkollës “Dëshmorët e Vitisë” për angazhimin dhe sukseset e tyre, së bashku me z. Jashari, i cili me përkushtim ka punuar me nxënësit.

Për më shumë informata rreth Garës më të madhe të Robotikës në Kosovë (KML), vizitoni linkun: https://www.kosovamakers.net/