Në komunën e Malishevës ka filluar fushata e dezinsektimit kundër rriqrave, për të luftuar dhe parandaluar Ethet Hemorragjike Krime Kongo (EHKK).

Kështu është bërë e ditur përmes një komunikatë për medie nga Komuna e Malishevës, ku thuhet se dezinsektimi i zonave endemike, bëhet në bashkërendim të aktiviteteve në mes të Komunës së Malishevës dhe Institutit Kombëtar të Shëndetësisë Publike e ministrive përgjegjëse, ndërsa financohet nga Ministria e Bujqësisë.

“Dezinsektimi që ju sot po bëni, do të thotë shumë për të gjithë banorët, pasi zvogëlon mundësinë e thumbimeve nga rriqrat dhe me këtë zvogëlon edhe mundësinë e infektimit nga virusi i etheve hemorragjike krime kongo, i cili përcillet përmes rriqrave. Puna e juaj dhe e të gjithë të tjerëve që janë të angazhuar në luftimin e këtij virusi, është jetike për banorët të cilët potencialisht mund të preken nga ky virus”, tha kryetari i Malishevës, Ragip Begaj.

Ndryshe, Komuna e Malishevës, si pasojë e prezencës së virusit të etheve hemorragjike krime kongo, që nga paslufta, ka qenë komuna më e prekur, ku si pasojë, deri në vitin 2013, kanë humbur jetën 18 qytetarë.

Sipas komunikatës së komunës së Malishevës, falë përkushtimit të vazhdueshëm të të gjitha institucioneve në luftimin e këtij virusi, tani është viti i shtatë që nuk ka raste të vdekjeve apo raste me infeksion nga EHKK. /Telegrafi/