“Feka” i “Kafeneja Jonë”: Deputetët janë shndërruar në aktorë të dobët, fjalimet e juaja janë patetike

Kuvendi i Kosovës ka mbyllur sesionin pranveror dhe deputetët kanë shkuar në pushime verore.

Por, duket se me debatet e përjavshme dhe të stërzgjatura në disa raste, ka bërë që të mos zgjojnë interes te disa artistë të vendit tonë.

Një prej tyre është edhe Shkumbin Istrefi, i cili njihet më mirë me emrin e “Feka” i serialit “Kafeneja Jonë”.

Ai ka reaguar përmes llogarisë personale në Facebook teksa u ka kërkuar deputetëve që t’i kursejnë qytetarët me fjalimet e tyre ripërsëritëse dhe patetike.

“Me faktin që mbledhjet transmetohen “live”, Parlamenti e ka humbe kuptimin dhe qëllimin e tij. Deputetët janë shndërruar në aktorë të dobët, të cilët me fjalimet e tyre patetike tentojnë të krijojnë përshtypje se po luftojnë për ndonjë kauzë. Më mirë mos i transmetoni mbledhjet, bile mendojmë që jeni të mençur e te dijshëm”, ka shkruar ai në rrjetet sociale.

Theksojmë se parlamenti, në mungesë kuorumi, nuk ka votuar rezolutën për dialogun Kosovë-Serbi, të propozuar nga Grupi Parlamentar i PSD-së.

Ndryshe, aktorin do ta shohim në disa projekte të ndryshme filmike që do të shfaqen në ekranet e mëdha të kinemave. /Telegrafi/