Fansat e Aaliyah janë zemëruar pasi kukulla ‘Barbie’ që nderon të ndjerën këngëtare, e krijuar për të festuar ditëlindjen e saj të 46-të, është shitur menjëherë.
Porositë paraprake për këtë edicion special të kukullës, e lëshuar më 16 janar, u shiten brenda pak minutash, duke shkaktuar zhgënjim te shumë adhurues.
Kukulla është frymëzuar nga veshja ikonike që Aaliyah mbante në videoklipin e saj "One In A Million" dhe është krijuar në bashkëpunim me vëllain e saj, Rashad Haughton, shkruan DailyMail.
Në një deklaratë, Krista Berger nga Mattel shprehu se kjo kukull do të shërbejë si një kujtesë për fansat që të ndjekin pasionet e tyre dhe të besojnë në potencialin e pafund.
Kukulla, që është pjesë e serisë Music Collector dhe kushton 55 dollarë, ishte një nderim për trashëgiminë e Aaliyah, që kishte arritur shumë sukses me hitet e saj dhe po ashtu me filmat si ‘Romeo Must Die’.
Përkundër kritikave të fansave që nuk mundën ta blinin kukullën, vëllai i Aaliyah, Rashad, ndau kujtime nga fëmijëria dhe e konsideroi këtë nderim si një mundësi për të fuqizuar fansat të ëndërrojnë dhe të arrijnë gjithçka. /Telegrafi/
