“Është një lojtar shumë interesant”, Klopp tregon admirimin për ‘të jashtëzakonshmin’ Haaland

Trajneri i Liverpoolit, Jurgen Klopp është një tifoz i madh i Erling Haaland, duke pranuar se ai nuk mund të mos interesohet për atë që po arrin sulmuesi në klubin e tij të vjetër, Borussia Dortmund.

Haaland, 21 vjeç, filloi sezonin 2021/22 të Bundesligës në mënyrë tipike bombastike, duke shënuar dy herë në ditën e parë të sezonit për të mposhtur Eintracht Frankfurtin me rezultat 5-2.

Ai krenohet me 62 gola të jashtëzakonshëm në 63 ndeshje për Dortmundin, një statistikë e çmendur që ka tërhequr vëmendjen e klubeve më të mëdha në botë.

Lexo po ashtu Erling Haaalnd e nis perfekt sezonin e ri në Bundesligë - tre asistime dhe dy gola ndaj Eintracht Frankfurt

Njëri nga të interesuarit e fundit është ish-trajneri i Dortmundit, Klopp, i cili ka thurë elozhe për sulmuesin norvegjez.

“Sigurisht që ekziston një rrezik me një talent kaq të jashtëzakonshëm. Djali është një forcë e natyrës”, ka thënë fillimisht Klopp për Bild.

“Gjatë një festimi të golit ai goditi topin në tokë … Nuk isha i sigurt nëse kishte ndonjë gjurmë në tokë më vonë!”.

“Herët a vonë ai do të jetë në bisedën e klubeve të mëdha. Nuk e di nëse ky rast do të jetë vitin e ardhshëm”.

Lexo po ashtu Ish-ylli i Borussia Dortmund, Michael Rummenigge: Liverpooli do të ishte klub perfekt për Haalandin

Kur u pyet nëse Liverpool do të ishte i interesuar për Haaland, Klopp tregoi simpati për sulmuesin.

“Ai është thjesht një lojtar shumë interesant. Më pëlqen shumë energjia që ai sjell në fushë. Por ai në përgjithësi do t’i përshtatet shumicës së ekipeve”, përfundoi gjermani. /Telegrafi/