Emigrimi dhe tregu i punës në Kosovë, GAP publikon raportin: Nga rreth 1.1 milion persona në moshë pune, vetëm 461 mijë persona janë ekonomikisht aktivë

Instituti GAP publikoi sot raportin “Emigrimi dhe tregu i punës në Kosovë: Potenciali i papërdorur i fuqisë punëtore joaktive”, ndërsa u tha se gjetjet e këtij raporti tregojnë se tregu i punës në Kosovë do të vazhdoj të sfidohet nga mungesa e fuqisë punëtore, kryesisht për shkak të emigrimit të qytetarëve dhe shkallës së lartë të fuqisë punëtore jo-aktive.

Gjetjet e raportit u prezantuan në kuadër të diskutimit të Forumit të Platformës për Dialog Publiko-Privat të Këshillit Kombëtar për Ekonomi dhe Investime (KKEI) mbi zhvillimin e fuqisë punëtore.

“Deri në vitin 2023, sipas të dhënave zyrtare, numri i personave që janë larguar nga Kosova drejt vendeve të ndryshme të botës ka arritur në 359 mijë persona, ndërkaq numri i shtetasve, shtetasit kosovarë të kthyer si dhe të huajt që jetojnë në Kosovë është rreth 99 mijë persona. Bilancit i emigrimit mbetet shumë më i lartë se i imigrimit dhe punëtorët e huaj që punësohen në Kosovë nuk e mbulojnë mungesën e krijuar në tregun e punës”, thuhet tutje.

Sipas GAP-it, zgjidhja më e qëndrueshme për të adresuar mungesën e fuqisë punëtore në Kosovë është rritja e përfshirjes në treg e personave që i takojnë moshës së punës, por që aktualisht nuk janë aktivë në treg (të cilët nuk janë duke punuar dhe nuk janë duke kërkuar punë).

“Kosova ka shkallën më të lartë të jo-aktivitetit në Ballkanin Perëndimor: nga rreth 1.1 milion persona në moshë pune, vetëm 461 mijë persona (43%) janë ekonomikisht aktivë, ndërsa 613 mijë persona  (57%) janë jo-aktivë. Nga personat jo-aktivë, 66% janë gra dhe 34% janë burra, që nënkupton se veçmas pjesëmarrja e ulët e grave në tregun e punës mbetet sfidë serioze.

GAP rekomandon që disa nga masat që duhen ndërmarrë për aktivizimin e fuqisë punëtore jo-aktive përfshijnë: trajnime të përshtatura me kërkesat reale të tregut të punës; politika që ndihmojnë gratë të hyjnë në tregun e punës; riorientim profesional për të rinjtë që nuk janë të angazhuar në arsim, punë apo trajnim (NEET); bashkëpunim i ngushtë mes arsimit dhe sektorit privat për përgatitje më të mirë profesionale; stimuj për punëdhënësit që punësojnë persona që kanë qenë jashtë tregut të punës për një kohë të gjatë; mbështetje për teknologjitë inovative dhe mbështetje për avancimin e shkathtësive në fushën e energjisë së pastër. /Telegrafi/