Elon Musk thotë se nëse oferta e tij për ta blerë Twitter-in është e suksesshme, ai do të anulojë ndalimin e Donald Trump nga platforma.

Sipas BBC, përcjell Telegrafi, njeriu më i pasur në botë ra dakord për një ofertë 44 miliardë dollarëshe me bordin e Twitter muajin e kaluar.

Por ai tha se nuk ishte një marrëveshje e përfunduar dhe se në mënyrë ideale do të përfundonte në dy deri në tre muajt e ardhshëm.

Vendimi i Twitter për të ndaluar ish-presidentin e SHBA-së ishte “moralisht i gabuar dhe budallallëk”, tha Musk në samitin e Financial Times, “Future of the Car”.

Në janar të vitit 2021, Twitter tha se llogaria e ish-presidentit amerikan ishte “pezulluar përgjithmonë… për shkak të rrezikut të nxitjes së mëtejshme të dhunës”, pas sulmit në Kapitol.

Por pronari i Tesla-s tha për Financial Times: “Unë do të anuloja ndalimin e përhershëm, por nuk e posedoj ende Twitter-in”.

“Ndalimi i Donald Trump nuk i dha fund zërit të Trump. Do ta përforcojë atë mes të djathtëve”, tha ai.

Musk tha se ndalimi i Trump ishte “një vendim i keq moral dhe marrëzi në ekstrem”.

Ai vuri në dukje se Trump kishte thënë më parë se nuk do të kthehej në Twitter edhe nëse llogaria e tij do të rivendosej.

Musk tha se kishte folur me bashkëthemeluesin e Twitter, Jack Dorsey, për çështjen e mbylljes së përdoruesve nga llogaritë e tyre të mediave sociale në përgjigje postimeve fyese.

“Ai dhe unë kemi të njëjtin mendim se ndalimet e përhershme duhet të jenë jashtëzakonisht të rralla dhe të rezervuara për llogaritë që janë robotë ose mashtruese”, tha ai.

“Unë mendoj se nuk ishte korrekte të ndalohej Donald Trump”. /Telegrafi/