ELEM kryen aktivitetet e nevojshme që të rrisë prodhimin e energjisë elektrike

Në konferencën e sotme për shtyp, drejtori i përgjithshëm i SHA ELEM, Dragan Minovski tha se udhëheqësia e re bën gjithçka që është e mundur për të rritur prodhimtarinë, në mënyrë që të minimizohet nevoja për import të energjisë elektrike, përcjell Telegrafi Maqedoni.

“Për momentin bëhen analiza për punën e udhëheqësisë paraprake, ndërsa aryeja kryesore për uljen e prodhimtarisë janë remontet e tre blloqeve të TEC Manastir, ku nuk janë kryer në kohë remontet e rregullta vjetore, si dhe modernizimi jo efikas i bllokut të dytë dhe të tretë në TEC Manastir, që ka kushtuar 66 milionë euro dhe me të cilin është zvogëluar kapaciteti i blloqeve për 40 megavatë-orë energji dhe për këtë shkak kompania ka humbur 130 milionë euro”, tha Minovski.

Ai shtoi se tashmë ka përfunduar remonti i bllokut të dytë në TEC Manastir, deri në fund të muajit duhet të kryhet në të parin, ndërsa në tetor pritet të fillojë remonti i bllokut të tretë.

Në elektrocentrale bëhet remont i plotë dhe, siç tha Minovski, cilësor me qëllim që me sukses të prodhohet gjatë stinës së dimrit. Në TEC Osllomej kryhen aktivitete në terren që termoelektrocentrali të jetë gati për prodhim dhe bëhen përpjekje për të siguruar sasinë e nevojshme të thëngjillit sepse tashmë janë shfrytëzuar sasitë e gërmuara./Telegrafi/